YLMY-AMALY MASLAHAT GEÇIRILDI
2025-nji ýylyň 28-nji maýynda Seýitnazar Seýdi adyndaky Türkmen döwlet mugallymçylyk institutynyň “Durnukly ösüş üçin ekologiýa bilimi” UNESCO kafedrasynyň guramagynda “Durnukly ösüşiň gazanylmagynda ýaşlaryň ekologiýa biliminiň orny” atly ylmy-amaly maslahat geçirildi. Oňa Türkmenistanyň Daşary işler ministrliginiň Halkara gatnaşyklary institutynyň mugallymlary sanly ulgam arkaly gatnaşdylar.
Bu maslahat Daşky gurşawy goramagyň bütindünýä güni mynasybetli geçirildi. Maslahatda çykyş edenler daşky gurşawy goramaklygyň, ekologiýa kadalaryny berjaý etmekligiň ýurdumyzyň döwlet syýasatynyň möhüm ugurlarynyň biri bolup durýandygyny aýratyn belläp geçdiler. Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň uly mugallymy Aýgözel Öwezowa “Ýurdumyzyň ekologiýa syýasatynda halkara Nowruz gününiň ähmiýeti” we Halkara hukugy we deňeşdirme hukuk öwreniş kafedrasynyň mugallymy Aýjan Omarowa “Deňlik we umumylyk – Türkmenistanyň suw diplomatiýasynyň esasy ýörelgeleri” atly ylmy makalalary bilen çykyş etdiler.
Şeýle maslahatlaryň geçirilmegi ýurdumyzyň ekologiýa syýasatyna ylmy esasda üns berilýändiginiň aýdyň subutnamasydyr.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň V ýyl talyby.