Biz barada
Gahryman Arkadagymyz Gurbanguly BERDIMUHAMEDOW:
— Ýakyn geljekde türkmen diplomatiýa gullugynyň esasyny düzmek, beýleki döwletlerde we halkara guramalarynda, daşary ykdysady gatnaşyklar ulgamynda, dünýäniň maglumatlary we hukuk giňişliginde Türkmenistana wekilçilik etmek hut siziň wezipäňiz bolar. Özüňize ýüklenen jogapkärçilige mynasyp boluň, öz Watanyňyzy söýüň, oňa buýsanyň, watançylar boluň, ýöne şunda beýleki ýurtlara we halklara,olaryň taryhyna, medeniýetine, däp-dessurlaryna hormat goýuň. Halkara parahatçylygyny, dostlugy we hyzmatdaşlygy pugtalandyrmagyň hatyrasyna öz ýurdumyza hyzmat etmek siziň borjuňyzdyr. Bu belent ýörelgeler ýol görkeziji şamçyrag, bu gün okuwyňyzyň, ertir bolsa siziň işiňiziň esasy many-mazmuny bolmalydyr.
Türkmenistanyň Prezidentiniň 2008-nji ýylyň 20-nji martynda çykaran Permany bilen Türkmenistanyň Daşary işler ministrliginiň Halkara gatnaşyklary instituty döredildi. Ýurdumyzyň diplomatik gullugy üçin zerur bolan halkara derejeli hünärmenleri taýýarlamak institutyň öňünde goýlan esasy wezipe bolup durýar. Türkmenistanyň Prezidentiniň Karary bilen tassyklanylan institutyň gurluşyna laýyklykda bu ýokary okuw mekdebinde fakultetleriň 4-si hereket edýär:
— Halkara gatnaşyklary fakulteti;
— Halkara hukugy fakulteti;
— Halkara ykdysady gatnaşyklary fakulteti;
— Halkara žurnalistikasy fakulteti.
Institutda kafedralaryň 6-sy bar:
1. Halkara gatnaşyklary we diplomatiýa kafedrasy;
2. Halkara hukugy we deňeşdirme hukuk öwreniş kafedrasy;
3. Halkara ykdysady gatnaşyklary kafedrasy;
4. Žurnalistikanyň nazaryýeti we amalyýeti kafedrasy;
5. Dünýä dilleri kafedrasy;
6. Jemgyýeti öwreniş ylymlary kafedrasy.
Institut Halkara gatnaşyklary we diplomatiýa, Halkara hukugy, Halkara ykdysady gatnaşyklary, Halkara žurnalistikasy boýunça ýokary bilimli hünärmenleri, taýýarlygyň Halkara gatnaşyklary, Halkara hukugy, Halkara ykdysadyýet, Syýasy kommunikasiýa we internet žurnalistikasy ugurlary boýunça bakalawrlary şeýle-de taýýarlygyň Sanly diplomatiýa, Seljeriş we strategik meýilleşdiriş, Gündogary öwreniş, Halkara jemagat hukugy, Halkara hususy hukugy, Halkara ykdysadyýet, Syýasy kommunikasiýa we internet žurnalistikasy ugurlary boýunça magistrleri taýýarlaýar. Bu ýerde 2 sany ylymlaryň doktory, 11 sany ylymlaryň kandidaty, 2 sany professor, 2 sany dosent, 23 sany uly mugallym, 21 sany mugallym we 20 sany öwreniji mugallym zähmet çekýär. Institutyň mugallymlary tarapyndan çap edilen kitaplaryň sany 63-e ýetip, şol sanda 47 sany okuw kitaby, 3 sany okuw gollanmasy, 5 sany monografiýa we 8 sany sözlük neşir edildi.
"Bitarap Türkmenistanyň daşary syýasy ugrunyň 2022-2028-nji ýyllar üçin Konsepsiýasynyň" geosyýasy we geoykdysady, hukuk, medeni-gumanitar ugurlaryny ylmy taýdan öwrenmek maksady bilen institutda Türkmenistanyň Ylymlar Akademiýasy tarapyndan bellige alnan we 2024-2026-njy ýyllara niýetlenen "Türkmenistanyň Merkezi Aziýada sebitleýin howpsuzlygyň üpjün edilmegi ugrunda alyp barýan syýasaty" atly köpçülikleýin ylmy iş alnyp barylýar.
2009-njy ýyldan başlap institut öz uçurymlaryny işe ýollap ugrady. 2009-2023-nji ýyllar aralygynda uçurymlaryň 776-sy instituty tamamlap, şolaryň 113-si tapawutlanan diplomlara mynasyp boldular. Şeýle-de 2022-nji ýylda ilkinji gezek 31 sany magistr tamamlap, olardan 4 sanysy tapawutlanan diploma mynasyp boldular. Şeýle hem 2023-nji ýylda 53 sany magistr tamamlap, olardan 4 sanysy tapawutlanan diploma mynasyp boldular. Institutyň uçurymlarynyň 153 sanysy ýurdumyzyň Daşary işler ministrliginiň ulgamyna (27-si institutyň özünde), hukuk goraýjy edaralaryna 82-si, Ykdysady we maliýe toplumyna 113-si, Türkmenistanyň Telewideniýe, radiogepleşikler we kinematografiýa baradaky Döwlet komitetine, şäher we welaýat gazetleriniň redaksiýalaryna 63-si, şeýle hem 365-si dürli edara-kärhanalara işe ugradyldy. Olaryň birnäçesi Diýarymyzyň daşary ýurtlardaky ilçihanalarynda we konsullyk edaralarynda işleýär.
Türkmenistanyň Prezidentiniň 2013-nji ýylyň 31-nji maýynda çykaran 13031-nji Karary bilen tassyklanan Türkmenistanyň Daşary işler ministrliginiň Halkara gatnaşyklary institutynyň talyplarynyň Türkmenistanyň daşary ýurtlardaky diplomatik wekilhanalarynda we konsullyk edaralarynda önümçilik tejribeligini geçmekleriniň tertibi hakynda Düzgünnama esasynda 2014-2023-nji ýyllar aralygynda institutyň 5-nji ýyl talyplarynyň 151-si döwletimiziň daşary ýurtlardaky diplomatik wekilhanalarynda, konsullyk edaralarynda we halkara guramalarynyň ýanyndaky hemişelik wekilhanalarynda 12 hepdelik önümçilik tejribeligini geçdiler.
Hormatly Prezidentimiziň 2021-nji ýylyň 9-njy iýulynda gol çeken 2318-nji Kararyna laýyklykda Türkmenistanyň Daşary işler ministrliginiň Halkara gatnaşyklary institutynyň gurluşy has-da kämilleşdirildi we Strategik barlaglar boýunça ylmy merkezi, Ýaş diplomatlaryň mekdebi hem-de Sanly ulgamlar we kommunikasiýa bölümi açyldy. 2021-2022-nji okuw ýylyndan başlap bakalawr maksatnamasy esasynda taýýarlygyň Halkara gatnaşyklary, Halkara ykdysadyýet, Syýasy kommunikasiýa we internet žurnalistikasy ugurlary, magistr maksatnamasy boýunça taýýarlygyň Sanly diplomatiýa, Halkara jemagat hukugy, Halkara hususy hukugy ugurlary, 2022-2023-nji okuw ýylyndan başlap bakalawr maksatnamasy esasynda taýýarlygyň Halkara hukugy ugry we magistr maksatnamasy boýunça taýýarlygyň Gündogary öwreniş, Seljeriş we strategik meýilleşdiriş, Syýasy kommunikasiýa we internet žurnalistikasy ugurlary, şeýle-de 2023-2024-nji okuw ýylyndan magistr maksatnamasy esasynda halkara ykdysadyýet taýýarlyk ugry boýunça ilkinji gezek magistrlere bilim berlip başlandy.
2023-nji ýylyň 21-nji noýabrynda Türkmenistanyň ýaş nesliň daşary syýasy başlangyçlaryny ösdürmäge goşýan goşandyny artdyrmak we ýurdumyzyň halkara abraýyny ýokarlandyrmak, ýaş işgärleriň hünär ussatlygyny hem-de netijeliligini ýokarlandyrmak maksady bilen, Türkmenistanyň Daşary işler ministrliginiň Halkara gatnaşyklary institutynyň ýanyndaky Ýaş diplomatlar merkezi döredildi.
Hormatly Prezidentimiziň 2023-nji ýylyň 11-nji dekabrynda Türkmenistanyň Daşary işler ministrliginiň Halkara gatnaşyklary institutynyň işini kämilleşdirmek hakynda gol çeken 803-nji Kararyna laýyklykda "Diplomatik protokol" atly ýöriteleşdirilen okuw merkezi açyldy we Administratiw-tehniki işgärleri taýýarlamak boýunça okuw merkezi ýapyldy.