2024-nji ýylyň 18-nji fewralynda ýurdumyzda Türkmenistanyň diplomatik işgärleriniň güni giňden bellenildi. Baýramçylyk dabaralarynyň aglabasy milli diplomatiýamyzyň ýokary mekdebi bolan Türkmenistanyň Daşary işler ministrliginiň Halkara gatnaşyklary institutynda geçirildi. Dabaralara Türkmenistanyň Daşary işler ministrliginiň ýolbaşçylary we hünärmenleri, daşary ýurtlaryň we halkara guramalaryň ýurdumyzdaky wekilhanalarynyň, köpçülikleýin habar beriş serişdeleriniň ýolbaşçylary, ýurdumyzyň ýokary okuw mekdepleriniň professor-mugallymlary gatnaşdylar.
Hormatly myhmanlar, ilki bilen, Türkmenistanyň Daşary işler ministrliginiň Halkara gatnaşyklary institutynyň «Diplomatik protokol» atly ýöriteleşdirilen okuw merkeziniň açylyş dabarasyna şaýat boldular. Onuň dowamynda ýöriteleşdirilen okuw merkeziniň geljekde alyp barjak işleri bilen tanyşdyryldy. Soňra baýramçylyk dabaralaryna gatnaşyjylar Türkmenistanyň diplomatik işgärleriniň gününe bagyşlanan sergä, şeýle-de institutymyzdaky durky täzelenen muzeýe aýlanyp gördüler. Sergide ýurdumyzyň daşary syýasatynyň möhüm ugurlary, halkara guramalaryň durmuşa geçirýän amallary, ýaş türkmen diplomatlaryny taýýarlamakda alnyp barylýan işler şöhlelendirildi.
Soňra Türkmenistanyň Daşary işler ministrliginiň Halkara gatnaşyklary institutynyň uly mejlisler zalynda «Magtymguly Pyragynyň parahatçylyk taglymaty we Bitarap Türkmenistanyň diplomatiýasy» atly halkara maslahat öz işine başlady. Maslahatyň başynda Türkmenistanyň hormatly Prezidenti Serdar Berdimuhamedowyň Türkmenistanyň diplomatik işgärleriniň güni mynasybetli iberen Gutlagy okaldy. Maslahatda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow, Birleşen Milletler Guramasynyň Türkmenistandaky Hemişelik Utgaşdyryjysy Dmitriý Şlapaçenko, Germaniýa Federatiw Respublikasynyň Türkmenistandaky Adatdan daşary we Doly ygtyýarly Ilçisi Mihael Uwe Birhoff, Eýran Yslam Respublikasynyň Türkmenistandaky Adatdan daşary we Doly ygtyýarly Ilçisi Ali Mojtaba Ali Mardan Rouzbehani, Italiýa Respublikasynyň Türkmenistandaky Adatdan daşary we Doly ygtyýarly Ilçisi Luiji Ferrari, Türkiýe Respublikasynyň Türkmenistandaky Adatdan daşary we Doly ygtyýarly Ilçisi Ahmet Demirok çykyş etdiler.
Çykyşlarda Türkmenistanyň alyp barýan hoşniýetli we parahatsöýüjilikli daşary syýasatynyň halkara gatnaşyklardaky orny, Türkmenistanyň Halk Maslahatynyň Başlygy, türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň ählumumy abadançylyga gönükdirilen başlangyçlary dogrusynda aýratyn bellenilip geçildi. Maslahatyň ahyrynda oňa gatnaşyjylaryň adyndan Türkmenistanyň hormatly Prezidenti Serdar Berdimuhamedowa Ýüzlenme kabul edildi.
Soňra hormatly myhmanlaryň gatnaşmagynda Türkmenistanyň diplomatik gullugynyň halypa diplomatlaryny «Türkmenistanyň ussat diplomaty» atly tapawutlandyryş nyşany bilen hem-de Türkmenistanyň Daşary işler ministrliginiň işgärlerini we Halkara gatnaşyklary institutynyň uçurym ýyl talyplaryny Ministrligiň diplomy bilen sylaglamak dabarasy geçirildi.
Dabaralar tamamlanandan soňra Türkmenistanyň diplomatik işgärleriniň güni mynasybetli kabul edişlik çäresi guraldy. Kabul edişlikden soňra myhmanlar Türkmenistanyň diplomatik işgärleriniň güni mynasybetli Türkmenistanyň Daşary işler ministrliginiň Halkara gatnaşyklary institutynyň döredijilik topary tarapyndan taýýarlanylan baýramçylyk konsertine tomaşa etdiler.
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallymy.
Bu barada şu ýerde hem okap bilersiňiz: