WAGYZ-NESIHAT DUŞUŞYKLARY GEÇIRILDI
2025-nji ýylyň 26-njy noýabrynda Türkmenistanyň Daşary işler ministrliginiň Halkara gatnaşyklary instituty tarapyndan ýaş nesilleri watansöýüjilik, ynanyşmak we parahatçylyk ruhunda terbiýelemek maksady bilen giň gerimli wagyz-nesihat çäreleri geçirildi. Bu çäreler Halkara parahatçylyk we ynanyşmak ýylynyň we ýurdumyzyň hemişelik Bitaraplygynyň 30 ýyllyk baýramynyň çäklerinde gurnaldy.
Duşuşykda institutyň Dünýä dilleri kafedrasynyň uly mugallymy Aýgözel Öwezowa çykyş edip, Aşgabat şäheriniň Berkarar etrabynyň 71-nji we 78-nji orta mekdepleriniň 6–12-nji synp okuwçylaryna Bitaraplygyň taryhy, milli we halkara derejesindäki ähmiýeti, şeýle-de 2025-nji ýylyň “Halkara parahatçylyk we ynanyşmak ýyly” hökmünde bellenilmeginiň maksady barada giňişleýin maglumat berdi. Şeýle hem institutynyň “Parahatçylyk medeniyeti” atly ÝUNESKO klubynyň agzalary N.Guljanowa, D.Allakow we A.Myradow dagylar prezentasiýa arkaly okuwçylar bilen sorag-jogap alyşdylar. Bitaraplyk we parahatçylyk temalary boýunça dogry jogap beren okuwçylara institutyň adyndan ýadygärlik sowgatlar gowşuryldy.
Bu çäre ýaşlaryň ýurdumyzyň oňyn bitaraplyk syýasatynyň parahatçylyk döredijilik, birek-birege hormat goýmak we ynanyşmak ýaly ýörelgeleri barada düşünjelerini artdyrmakda hem-de olary watansöýüjilik, belent adamkärçilik ruhunda terbiýelemekde ähmiýetli wagyz-nesihat duşuşygy boldy.
Derkar ALLAKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.