WAGYZ-NESIHAT ÇÄRESI GEÇIRILDI
2026-njy ýylyň 15-nji maýynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimiziň parasatly baştutanlygynda Garaşsyz, baky Bitarap Diýarymyzda sagdyn durmuş kadalaryny berjaý etmek boýunça alnyp barylýan döwlet syýasatyny üstünlikli durmuşa geçirmek, şeýle-de «Türkmenistanda temmäkä garşy göreşmek boýunça 2026-njy ýylyň maý aýynyň 1-31-i aralygynda geçiriljek çäreleriň meýilnamasyna» laýyklykda talyp ýaşlaryň arasynda zyýanly endikleriň ýaramaz täsirini düşündirmek, sagdyn durmuş we milli ahlak ýörelgelerini ýaýbaňlandyrmak maksady bilen wagyz-nesihat duşuşygy geçirildi.
Çäräni Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gaýgysyz Döwletow alyp bardy. Wagyz-nesihat duşuşygyna Türkmenistanyň Mejlisiniň, Türkmenistanyň Baş prokuraturasynyň, Türkmenistanyň Ýokary kazyýetiniň, Türkmenistanyň Magtymguly adyndaky Ýaşlar guramasynyň, Türkmenistanyň Içeri işler ministrliginiň, Türkmenistanyň Saglygy goraýyş we derman senagaty ministrliginiň, Türkmenistanyň Demokratik partiýasynyň, Türkmenistanyň Kärdeşler arkalaşyklarynyň Milli merkeziniň wekilleri gatnaşyp, olar öz çykyşlarynda ýaşlaryň arasynda terbiýeçilik işlerini güýçlendirmek, olaryň ýüze çykýan nogsanlyklardan daşda durmaklaryny, milli däp-dessurlarymyzy mynasyp dowam etmeklerini, köçe-ýol hereketiniň kadalaryny berjaý etmeklerini gazanmak, zyýanly endikleriň ynsan saglygyna ýetirýän zeperi baradaky sowatlylygyny ýokarlandyrmak, jenaýatçylygyň öňüni almak, internet ulgamynyň mümkinçiliklerinden dogry peýdalanmak dogrusynda gürrüň berdiler.
Wagyz-nesihat çäresiniň dowamynda ýurdumyzda ýaş nesilleriň kämil bilimli, sagdyn bedenli, giň dünýägaraýyşly, päk ahlakly şahsyýetler bolup ýetişmegi, ýaşlaryň hukuklarynyň goraglylygy bilen baglanyşykly meselelere aýratyn üns berlip, giňişleýin sorag-jogap alşyldy.
Duşuşygyň ahyrynda oňa gatnaşyjylar halkymyzyň bagtyýar, abadan durmuşda ýaşamagy, nesilleriň hemmetaraplaýyn kämil ynsanlar bolup ýetişmegi ugrunda taýsyz tagallalar edýän Gahryman Arkadagymyza, Arkadagly Gahryman Serdarymyza hoşallyk sözlerini beýan etdiler.
Gülkamar SAPAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby