Türkmenistanyň Hytaý Halk Respublikasyndaky Ilçisi bilen okuw sapagy geçirildi
2022-nji ýylyň 22-nji dekabrynda Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw Merkezinde “Suw diplomatiýasy” ugry boýunça Türkmenistanyň Hytaý Halk Respublikasyndaky Adatdan daşary we Doly ygtyýarly Ilçisi Parahat Durdyýewiň, şeýle-de institutyň talyplarynyň gatnaşmagynda okuw sapagy geçirildi.
Hormatly Ilçi Parahat Durdyýew okuw sapagynyň dowamynda suwdan netijeli peýdalanmak boýunça iki ýurduň arasynda alnyp barylýan işler barada giňişleýin gürrüň berdi. Şeýle hem iki ýurduň syýasatynyň ileri tutulýan ugurlary bolan daşky gurşawy goramak, tebigata aýawly garamak, nesiller üçin tebigy baýlyklary gorap saklamak, Durnukly ösüş maksatlaryna ýetmekde dünýä jemgyýetçiliginiň tagallalaryny birleşdirmek ugrunda eýýäm birnäçe ýyllardan bäri uly işleriň durmuşa geçirilýändigi barada dürli mysallary getirmek arkaly giňişleýin gürrüň berdi. Ýene-de şu ýylda möhüm ähmiýetli wakalaryň biri bolan Türkmenistan bilen Hytaý Halk Respublikasynyň arasynda diplomatik gatnaşyklaryň ýola goýulmagynyň 30 ýyllygy barada nygtady. Diplomat iki dostlukly halky birleşdiren Beýik Ýüpek ýoly barada söz açyp, bu ýoluň häzirki döwürde ýurtlaryň we halklaryň ýakynlaşmagy üçin kuwwatly güýç bolup hyzmat edýändigini belledi.
Duşuşygyň dowamynda suw diplomatiýasynyň öňünde duran meseleleri çözülende halkara hukugyň umumy kabul edilen kadalaryna laýyklykda, ähli ýurtlarynyň bähbitlerini nazara tutmagyň zerurdygy nygtaldy. Türkmenistanyň Hytaý Halk Respublikasyndaky Ilçisi bilen geçirilen duşyşyk talyplaryň suw diplomatiýasy baradaky bilimlerini artdyrrmaga uly ýardam berdi.
Bägül MERDANOWA,
Türkmenistanyň Daşary işler ministrliginiň
Halkara žurnalistikasy fakultetiniň
Halkara gatnaşyklary institutynyň III ýyl talyby.