SUW DIPLOMATIÝASYNA BAGYŞLANAN MASLAHAT
2024-nji ýylyň 17-nji ýanwarynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň «Suw diplomatiýasy» ugrunyň gurnamagynda Türkmenistanyň Mejlisiniň, Türkmenistanyň Suw hojalygy baradaky döwlet komitetiniň we Türkmenistanyň Hazar deňzi institutynyň wekilleriniň gatnaşmagynda maslahat geçirildi.
Türkmenistanyň Suw hojalygy baradaky döwlet komitetiniň garamagyndaky «Türkmensuwylmytaslama» institutynyň Ylmy-barlag bölüminiň esasy ylmy işgäri, oba hojalyk ylymlarynyň kandidaty G.Annabaýew öz çykyşynda «Merkezi Aziýanyň suw gorlaryny ulanmakda Türkmenistanyň, Özbegistanyň we Täjigistanyň tejribesi» atly tema boýunça çykyş etdi. Öz gezeginde hünärmen, suw hojalyk meseleleriniň Merkezi Aziýanyň ähli döwletleriniň bähbitlerini hasaba almak bilen, toplumlaýyn esasda çözülmegi döwlet Baştutanymyzyň suw strategiýasynyň esasy ugrudygyny belledi.
Türkmenistanyň Mejlisiniň deputaty, Daşky gurşawy goramak, tebigatdan peýdalanmak we agrosenagat toplumy baradaky komitetiniň agzasy B.Myradowa «Howanyň üýtgemegi: ekologiýa durnuklylygy bilen parahatçylygy döretmegiň arasyndaky baglanyşyk» atly tema boýunça çykyş etdi. B.Myradowa öz çykyşynda tebigaty goramak, ekologik howpsuzlygy üpjün etmek, ekologik medeniýeti berjaý etmek wezipelerini durmuşa geçirmekde ýaş nesliň uly ornunyň bardygyny nygtady.
Türkmenistanyň Hazar deňzi institutynyň Hukuk, işgärler we ýörite işler müdirliginiň başlygynyň orunbasary L.Galiýewa «Türkmenistanyň Prezidentiniň Hazar ekologik başlangyjy teklibiniň ähmiýeti» atly tema boýunça çykyş etdi. Bilşimiz ýaly bu başlangyç hormatly Prezidentimiz Arkadagly Gahryman Serdarymyz tarapyndan Birleşen Milletler Guramasynyň Baş Assambleýasynyň 78-nji sessiýasynda girizildi.
Suw diplomatiýasy boýunça maslahat talyplar üçin örän täsirli bolup, olar özlerini gyzyklandyrýan sowallara jogap tapdylar.
Çynar NURJANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby