SUW DIPLOMATIÝASY UGRY BOÝUNÇA NOBATDAKY OKUW SAPAGY
2023-nji ýylyň 26-njy dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Daşky gurşawy goramak ministrliginiň Gidrometeorologiýa bölüminiň başlygy S.Eýeberenowyň alyp barmagynda Türkmenistanyň diplomatiýasynyň möhüm ugurlary boýunça okuw merkezinde “Türkmenistanyň suw gorlary we olary rejeli ulanmak boýunça halkara hyzmatdaşlygy” atly tema boýunça okuw sapagy geçirildi.
Bu günki okuw sapagynda Türkmenistanyň Daşky gurşawy goramak ministrliginiň wekili, hormatly Prezidentimiziň durmuş-ykdysady strategiýasynda obasenagat toplumyny sazlaşykly ösdürmegiň, daşky gurşawy goramagyň, ýurdumyzyň ilatynyň durmuş-ýaşaýyş şertlerini gowulandyrmagyň möhüm şerti bolan suw serişdeleriniň rejeli ulanylmagyna aýratyn ähmiýet berilýändigi, suwy rejeli ulanmak syýasatynyň çäklerinde “Altyn asyr” Türkmen kölüni özleşdirmegiň Konsepsiýasyny durmuşa geçirmek boýunça 2019 — 2025-nji ýyllar üçin çäreleriň Meýilnamasynyň yzygiderli amala aşyrylýandygy barada giňişleýin gürrüň berdi. Türkmenistan suw serişdelerinden, serhetüsti suwlardan rejeli peýdalanmak meseleleri boýunça oňyn hyzmatdaşlygy ösdürmek ugrunda çykyş etmek bilen, bu ulgamda möhüm başlangyçlary öňe sürýär. Bu babatda halkara hukuk kadalarynyň berjaý edilmegine hem-de sebitiň ähli döwletleriniň bähbitleriniň doly hasaba alynmagyna uly üns berilýär.
Talyplar üçin suw diplomatiýasy ugry boýunça nobatdaky okuw sapagy örän täsirli bolup, onda talyplar özlerini gyzyklandyrýan sowallara jogap tapdyrlar.
Aýlar ŞÜKÜROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.