“Suw diplomatiýasy” ugry boýunça nobatdaky okuw sapagy
2022-nji ýylyň 21-nji dekabrynda Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw Merkezinde “Suw diplomatiýasy” ugry boýunça Türkmenistanyň Ermenistan Respublikasyndaky Adatdan daşary we Doly ygtyýarly Ilçisi Muhammetgeldi Aýazowyň, şeýle-de institutyň talyplarynyň gatnaşmagynda okuw sapagy geçirildi. Okuw sapagy Türkmenistan bilen Ermenistan Respublikasynyň arasyndaky suw meseleleri boýunça alnyp barylýan işlere bagyşlandy.
Hormatly Ilçi Muhammetgeldi Aýazow okuw sapagynyň dowamynda sebitde suwdan netijeli peýdalanmak boýunça alnyp barylýan işler barada giňişleýin gürrüň berdi. Şeýle hem iki ýurduň syýasatynyň ileri tutulýan ugurlarynyň daşky gurşawy goramakdan, tebigata aýawly garamakdan, geljekki nesiller üçin onuň baýlyklaryny gorap saklamakdan, türkmen halkynyň durmuşynyň oňaýly şertlerini döretmek üçin ýer-suw serişdelerinden oýlanyşykly peýdalanmakdan, Durnukly ösüş maksatlaryna ýetmekde dünýä jemgyýetçiliginiň tagallalaryny birleşdirmekden ybaratdygyny belläp geçdi.
Okuw sapagynyň dowamynda suw-energetika meseleleri çözülende halkara hukugyň umumy kabul edilen kadalaryna daýanmak, sebitiň ähli ýurtlarynyň bähbitlerini nazara almak hem-de abraýly halkara guramalaryny, ilkinji nobatda, Birleşen Milletler Guramasyny işjeň gatnaşmaga çekmek zerur bolup durýandygy aýratyn bellenilip geçildi. Geçirilen bu okuw sapagy talyplar üçin örän täsirli bolup, olar özlerini gyzyklandyrýan sowallara giňişleýin jogap aldylar şeýle-de bilimlerini has kämilleşdirdiler.
Mähriban HUDAÝGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň III ýyl talyby.