SUW DIPLOMATIÝASY, HALKARA SUW HUKUGY WE GIDROTEHNIKI DESGALARYŇ HOWPSUZLYGY BOÝUNÇA OKUW SAPAGY
2024-nji ýylyň 7-nji iýunynda Aşgabat şäheriniň “Arçabil” myhmanhanasynda suw diplomatiýasy we halkara suw hukugy, suw serişdelerini netijeli peýdalanmak hem-de gidrotehniki desgalaryň howpsuzlygy boýunça degişli ugruň hünärmenleri üçin okuw sapagy geçirildi. Okuw sapagynyň maksady dünýäde we Merkezi Aziýada suw serişdeleriniň halkara-hukuk düzgünleşdirilmeginiň aýratynlyklaryny açyp görkezmekden, “suw hyzmatdaşlygy” düşünjesi bilen suw diplomatiýasynyň arabaglanyşygyny, suw diplomatiýasynyň esasy serişdelerini düşündirmekden ybaratdyr.
Agzalan okuw sapagy Merkezi Aziýanyň sebitleýin ekologiki meseleleri boýunça merkeziniň, ABŞ-nyň Halkara ösüş guramasynyň Suw we daşky gurşaw boýunça sebitleýin taslamasynyň Türkmenistanyň Suw hojalygy baradaky döwlet komitetiniň bilelikde guramagynda geçirildi.
Okuw sapagyna Türkmenistanyň Suw hojalygy baradaky döwlet komitetiniň, Türkmenistanyň Bilim ministrliginiň, Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, S.A.Nyýazow adyndaky Türkmen oba hojalyk uniwersitetiniň we ýurdumyzyň beýleki ýokary okuw mekdepleriniň wekilleri gatnaşdylar.
Okuw sapagynyň dowamynda taslamanyň hünärmeni G.Gurtöwezow “Suw serişdelerini rejeli peýdalanmak, gidrotehniki desgalaryň howpsuzlygy we serhetüsti suw hyzmatdaşlygy”, “Serhetüsti suw hyzmatdaşlygy” atly okuw sapaklarynyň mazmuny bilen tanyşdyrdy. Şeýle hem hünärmen suw serişdelerini we serhetüsti derýalary ulanmak boýunça Türkmenistanyň ikitaraplaýyn we köptaraplaýyn ylalaşyklarynyň üstünde aýratynlykda durup geçdi.
Suw diplomatiýasy we halkara suw hukugy, suw serişdelerini netijeli peýdalanmak hem-de gidrotehniki desgalaryň howpsuzlygy boýunça boýunça okuw sapagy örän täsirli bolup, onda gatnaşyjylar özlerini gyzyklandyrýan sowallaryna jogap tapdylar.
Merjen Durdyýewa,
Türkmenistanyň Daşary işler ministrliginiň
Halkara
gatnaşyklary institutynyň
Halkara hukugy we deňeşdirme
hukuk öwreniş kafedrasynyň mugallymy.