SUW DIPLOMATIÝASY BOÝUNÇA OKUW SAPAGY GEÇIRILDI
2022-nji ýylyň 7-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň suw diplomatiýasy ugry boýunça nobatdaky okuw sapagy geçirildi. Okuw sapagyny Birleşen Milletler Guramasynyň Türkmenistandaky hemişelik utgaşdyryjysy Dmitriý Şlapaçenko alyp bardy. Okuw sapagy Aralýaka sebitiniň ekologik meselelerine bagyşlanyp, bu mesele babatynda talyplaryň pikirleri diňlenildi. Okuw sapagynyň dowamynda Birleşen Milletler Guramasynyň Türkmenistandaky hemişelik utgaşdyryjysy Aral deňziniň basseýninde ekologik we durmuş-ykdysady ýagdaýy gowulandyrmak babatynda alnyp barylýan işleri we 2018-nji hem 2019-njy ýyllarda kabul edilen «Birleşen Milletler Guramasynyň we Araly halas etmegiň halkara gaznasynyň arasynda hyzmatdaşlyk» atly BMG-niň Baş Assambleýasynyň Kararnamalarynyň ähmiýetini giňişleýin gürrüň berdi. Oňa Türkmenistanyň oba hojalyk uniwerstitetiniň we institutymyzyň talyp ýaşlary gatnaşdylar. Talyplar sapagyň ahyrynda rus we iňlis dillerinde özlerini gyzyklandyrýan sowallara jogap tapdylar.
Leýli ARAPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy hünäriniň 2-nji ýyl talyby.