SUW DIPLOMATIÝASY BOÝUNÇA NOBATDAKY OKUW SAPAGY
2024-nji ýylyň 16-njy oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Suw diplomatiýasy” ugry boýunça nobatdaky okuw sapagy geçirildi. Okuw sapagyny Türkmenistanyň Hazar deňzi institutynyň Hukuk işgärler we ýörite işler müdirliginiň başlygynyň orunbasary G.Çarygulyýewa alyp bardy.
Bu okuw sapagy “Merkezi Aziýada suw diplomatiýasynyň orny, Suw diplomatiýasynda ýetilen sepgitler” atly tema boýunça geçirildi. Bilşimiz ýaly, Türkmenistanyň diplomatiýasynyň möhüm ugurlarynyň biri bolan “Suw diplomatiýasy” Merkezi Aziýada halkara hyzmatdaşlygyny ösdürmekde wajyp ähmiýete eýedir. Merkezi Aziýa ýurtlarynyň arasyndaky özara hereketleriň ähmiýetli ulgamlary we suw diplomatiýasynyň esasy ugurlary barada jikme-jik durlup geçildi. Şeýle hem daşky gurşawyň goraglylygynyň prosesiniň mümkingadar wehimlerine hem-de Durnukly ösüş maksatlaryna ýetmek üçin Merkezi Aziýada suw hyzmatdaşlygyny kämilleşdirmegiň mümkinçiliklerine seredilip geçildi.
Suw diplomatiýasy boýunça nobatdaky okuw sapagy talyplar üçin örän täsirli bolup, olar özlerini gyzyklandyrýan sowallaryna jogap aldylar.
Azanali AZIZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.