SUW DIPLOMATIÝASY BOÝUNÇA NOBATDAKY OKUW SAPAGY
2024-nji ýylyň 24-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Suw diplomatiýasy” ugry boýunça nobatdaky okuw sapagy geçirildi. Okuw sapagyny Türkmenistanyň Mejlisiniň Daşky gurşawy goramak, tebigatdan peýdalanmak we agrosenagat toplumy baradaky komitetiniň agzasy A.Seýitbaýew alyp bardy.
Bu okuw sapagy “Howanyň üýtgemegi: ekologiýa durnuklylygy bilen parahatçylygy döretmegiň arasyndaky baglanyşyk” atly tema boýunça geçirildi.
BMG-niň biologik köpdürlilik, çölleşmä garşy göreşmek, howanyň üýtgemegi, ozon gatlagyny goramak hakynda resminamalarynyň ýurdumyz tarapyndan tassyklanylmagy Türkmenistanyň häzirki döwrüň ählumumy ekologiýa meselelerini çözmekde işjeň orun eýeleýändiginiň aýdyň güwäsidir.
Türkmenistanyň Mejlisiniň wekili özüniň çykyşynda ýurdumyzyň abraýly halkara guramalar, şol sanda BMG-niň Ösüş maksatnamasy, Daşky gurşaw boýunça maksatnamasy, Ählumumy ekologiýa gaznasy we beýleki düzümler bilen bilelikde bu ugurda milli hem-de sebit derejelerinde maksatnamalaryň we taslamalaryň onlarçasynyň durmuşa geçirilýändigi, şeýle hem häzirki wagtda bu ugurda üstünlikli amala aşyrylýan milli strategiýa Milletler Bileleşiginiň Durnukly ösüş maksatlaryna we dünýäniň ekoulgamyny goramak boýunça öňde durýan möhüm wezipelere doly laýyk gelýändigi barada giňişleýin gürrüň berdi.
Suw diplomatiýasy boýunça nobatdaky okuw sapagy talyplar üçin örän täsirli bolup, olar özlerini gyzyklandyrýan sowallara jogap tapdylar.
Tawus NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.