SUW DIPLOMATIÝASY BOÝUNÇA NOBATDAKY OKUW SAPAGY
2024-nji ýylyň 1-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Suw diplomatiýasy” ugry boýunça nobatdaky okuw sapagy geçirildi. Okuw sapagyny Türkmenistanyň Suw hojalygy baradaky döwlet komitetiniň “Türkmensuwylymtaslama” Türkmen Döwlet suw hojalyk ylmy-önümçilik we taslama institutynyň esasy ylmy işgäri G.Annabaýew alyp bardy.
Bu okuw sapagy “Serhetüsti suwlaryny peýdalanmagyň halkara hukuk esaslary” atly tema boýunça geçirildi.
Türkmenistanyň Suw kodeksine laýyklykda, “serhetüsti suwlar” bu iki we şondan-da köp daşary ýurt döwletleriniň arasyndaky serhedi kesip geçýän ýa-da olaryň üsti boýunça döwlet serhedi geçýän suw obýektleridir. Türkmen Döwlet suw hojalyk ylmy-önümçilik we taslama institutynyň wekili serhetüsti suw serişdelerini toplumlaýyn we sazlaşykly peýdalanmagyň özara ýaramly usulyny işläp taýýarlamak bilen baglanyşykly ähli meseleler sebitiň hemme döwletleriniň bähbitlerini nazara almak bilen, diňe halkara hukugynyň umumylykda ykrar edilen kadalarynyň hem-de ýörelgeleriniň esasynda çözülmelidigini belledi. Aýdylanlar babatda Birleşen Milletler Guramasyna we onuň Türkmenistandaky Sebit merkezine möhüm orun degişlidir, şol merkeziň işi maglumatlary we häzirki döwrüň giň möçberli meseleleri boýunça tejribe alyşmak üçin şertleri döretmäge ýardam edýändigini belledi.
Suw diplomatiýasy boýunça okuw sapagynyň ahyrynda talyplar agzalan tema boýunça özlerine gyzykly bolan maglumatlar babatda sorag-jogap alyşdylar. Suw diplomatiýasy boýunça nobatdaky okuw sapagy örän täsirli geçdi.
Oraz NURLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.