«Tomusky uniwersitet — 2024» taslamasynyň jemi jemlendi
2024-nji ýylyň 19-njy iýulynda Kazan şäherinde «Tomusky uniwersitet» taslamasynyň jemi jemlendi. Ol Russiýa Federasiýasynyň ylym we ýokary bilim ministrliginiň hem-de «Sosiosentr» federal döwlet awtonom ylmy institutynyň goldamagynda Kazan Federal uniwersiteti tarapyndan amala aşyrylýar.
KFU-nyň daşary aragatnaşyklar boýunça prorektory Timirhan Alişewiň belleýşi ýaly, şu ýyl «Tomusky uniwersitet» taslamasyna gatnaşmaga dünýäniň dürli ýurtlaryndan ýokary okuw mekdepleriniň wekillerinden 3000 haýyşnama gelip gowuşdy. Netijede, 13 ýurtdan 400 talyp gatnaşmaga çagyryldy. Kazanda geçirilen «Tomusky uniwersitet» taslamasyna Türkmenistanyň Daşary işler ministrliginiň Halkara gatnaşyklary institutynyň 3-nji ýyl talyby Jennet Myradowa hem-de rus dili mugallymy Maýa Çaryýewa, şeýle-de Türkmen döwlet ykdysadyýet we dolandyryş institutynyň 4 sany talyp ýaşlary gatnaşdylar.
Taslamanyň myhmanlary üçin iki hepdelik gyzykly we baý maksatnama taýýarlanyldy. Ol aşakdaky ugurlar boýunça geçirildi: «Emeli aň we Prompt-engineering maglumat tehnologiýalary», «Geljegiň tehnologiýalary: fizika we inženeriýa», «Dil. Medeniýet. Döredijilik», «Binagärlik. Dizaýn. Urbanizm», Business Analytics 5.0: Design and Development of Information Panels with Yandex Data Lens (iňlis dilinde), BRICS+: New Trends in International Relations. Giň gerimli bilim maksatnamasyndan başga-da, Kazanyň myhmanlaryna medeni çäreler, tanyşlyk gezelençleri, şäher we Tatarystan Respublikasy bilen tanyşlyklar guraldy.
Türkmen ýaşlaryna okamaga, öwrenmäge, daşary ýurtlara baryp görmäge uly mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun, tutýan tutumly işleri hemişe rowaçlyklara ýar bolsun!
Jennet MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.