«Parahatçylygyň ýaş çaparlary» akyl-paýhas bäsleşiginiň ähli finalçylary belli boldy
2023-nji ýylyň 28-nji aprelinde Türkmenistanyň Daşary işler ministrliginiň Halkara gatnaşyklary institutynda hereket edýän Ýaş diplomatlaryň mekdebi tarapyndan guralýan «Parahatçylygyň ýaş çaparlary» atly akyl-paýhas bäsleşiginiň 2022-2023-nji okuw ýylyndaky II möwsüminiň II ýarym final oýny geçirildi. «Dialog — parahatçylygyň kepili: gadymy eýýamyň diplomatik mirasynda parahatçylyk medeniýeti» atly umumy şygar astynda geçirilýän möwsümiň ýarym final oýunlarynyň temasy «Siwilizasiýalaryň dialogy — adamzat parahatçylygy üçin binýatlyk esasdyr» diýlip atlandyryldy.
Akyl-paýhas bäsleşiginiň II möwsüminiň II ýarym final oýnuna Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 10-njy synp okuwçysy Azat Amansähedow, Aşgabat şäherindäki 86-njy ýöriteleşdirilen orta mekdebiniň 11-nji synp okuwçysy Döwletmyrat Arazow, Daşoguz welaýatynyň Daşoguz şäheriniň 24-nji orta mekdebiniň 11-nji synp okuwçysy Şyhdurdy Şyhyýew, Mary welaýatynyň Sakarçäge etrabyndaky daşary ýurt dillerine ýöriteleşdirilen 35-nji orta mekdebiniň 10-njy synp okuwçysy Aýgül Sähedowa, Aşgabat şäheriniň ýöriteleşdirilen 16-njy orta mekdebiniň 11-nji synp okuwçysy Allanazar Ataýew, Aşgabat şäheriniň Saparmyrat Türkmenbaşy adyndaky umumybilim berýän ýöriteleşdirilen mekdep-internatynyň 11-njy synp okuwçysy Sahydöwlet Hümmetjumaýew, Balkan welaýatynyň Balkanabat şäheriniň iňlis dili, fizika we matematika dersleri çuňlaşdyrylyp öwredilýän ýöriteleşdirilen 22-nji orta mekdebiniň 11-nji synp okuwçysy Gülsere Garryjaýewa hem-de Mary welaýatynyň Mary şäheriniň iňlis dili we ynsançylyk ugurly okuw dersleri çuňlaşdyrylyp öwredilýän ýöriteleşdirilen welaýat mekdebiniň 11-nji synp okuwçysy Dawut Gezerow dagy gatnaşdylar.
Akyl-paýhas bäsleşiginiň II möwsüminiň II ýarym final oýnuna «Pähimdarlar geňeşiniň» agzalary hökmünde, ÝUNESKO-nyň işleri barada Türkmenistanyň milli toparynyň jogapkär sekretary, Türkmenistanyň Gahrymany Çynar Rustemowa, Türkmen döwlet maliýe institutynyň Jemgyýeti öwreniş ylymlary kafedrasynyň müdiri, taryh ylymlarynyň kandidaty, professor Meretguly Öwlüýägulyýew hem-de Magtymguly adyndaky Türkmen döwlet uniwersitetiniň Dünýä taryhy kafedrasynyň uly mugallymy Şamuhammet Akmyradow dagy adalatly eminlik etdiler.
Çekeleşikli geçen bäsleşigiň jemleri boýunça Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 10-njy synp okuwçysy Azat Amansähedow, Aşgabat şäherindäki 86-njy ýöriteleşdirilen orta mekdebiniň 11-nji synp okuwçysy Döwletmyrat Arazow, Mary welaýatynyň Sakarçäge etrabyndaky daşary ýurt dillerine ýöriteleşdirilen 35-nji orta mekdebiniň 10-njy synp okuwçysy Aýgül Sähedowa hem-de Mary welaýatynyň Mary şäheriniň iňlis dili we ynsançylyk ugurly okuw dersleri çuňlaşdyrylyp öwredilýän ýöriteleşdirilen welaýat mekdebiniň 11-nji synp okuwçysy Dawut Gezerow II ýarym final oýnunyň ýeňijisi diýlip yglan edildi. Netijede ýeňijiler final oýnuna gatnaşmaga hukuk gazandylar.
Ozal habar berşimiz ýaly, düýn akyl-paýhas bäsleşiginiň II möwsüminiň I ýarym final oýny geçirilip, onda ýeňiji bolan dört sany gatnaşyjy finalda oýnuna gatnaşmaga hukuk gazanypdy. Şeýlelikde, «Parahatçylygyň ýaş çaparlary» atly akyl-paýhas bäsleşiginiň 2022-2023-nji okuw ýylyndaky II möwsüminiň final oýnunyň ähli gatnaşyjylary belli boldy.
Akyl-paýhas bäsleşiginiň bu oýnuna Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Ýedi dogan» hususy kärhanasy, «Muhammet Balkan» hojalyk jemgyýeti hemaýatkärlik etdiler. Ýeňijiler we bäsleşige gatnaşyjylar hemaýatkärler tarapyndan taýýarlanylan gymmat bahaly ýadygärlik sowgatlary hem-de Türkmenistanyň Daşary işler ministrliginiň Halkara gatnaşyklary institutynyň Hormat hatlary bilen sylaglandylar.
«Parahatçylygyň ýaş çaparlary» atly akyl-paýhas bäsleşiginiň II möwsüminiň II ýarym final oýny «Miras» teleýaýlymy bilen institutyň okuw studiýasy tarapyndan bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.
Mätgurban MÄTGURBANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.
Bu barada şu ýerde hem okap bilersiňiz:
https://ashgabat.in/2023/04/27/yas-caparlar-finala-tarap/
https://turkmenistan.gov.tm/tk/habar/71958/parahatcylygyn-yas-caparlary-final-tapgyra-gatnasyjylar-malim-boldy
https://turkmenportal.com/tm/blog/61340/15-maya-v-ashhabade-proidet-final-igry-yunye-vestniki-mira
https://turkmenportal.com/blog/61340/15-maya-v-ashhabade-proidet-final-igry-yunye-vestniki-mira
https://centralasia.news/21151-v-turkmenistane-15-maja-projdet-final-konkursa-junye-vestniki-mira.html