Pandemiýa boýunça geçirilen onlaýn okuw maslahaty
2021-nji ýylyň 7-8-nji sentýabrynda Aşgabatda “Pandemiýa we saglygy goraýyş ugurda adatdan daşary ýagdaýlarda döwlet edaralarynyň jemgyýet we habar beriş serişdeleri bilen aragatnaşyk saklamak mümkinçiliklerini ýokarlandyrmak” atly halkara onlaýn okuw maslahaty geçirildi. Türkmenistan bilen hyzmatdaşlygyň çäklerinde Ýewropada Howpsuzlyk we Hyzmatdaşlyk Guramasynyň Aşgabatdaky Merkezi tarapyndan guralan bu okuw maslahatyna ýurdumyzyň ministrlikleriniň we pudaklaýyn dolandyryş edaralarynyň, ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň, şeýle hem köpçülikleýin habar beriş serişdeleriniň wekilleri gatnaşdylar. Iki günlük okuwy Ýewropada Howpsuzlyk we Hyzmatdaşlyk Guramasy tarapyndan bilermenler Dmitriý Strowskiý hem-de Gülnura Toraliýewa alyp bardylar.
Okuw maslahatynda pandemiýa şertlerinde bu keseliň öňüni almak boýunça döwlet çärelerini geçirmekde toplanan tejribeler, döwlet edaralarynyň köpçülikleýin habar beriş serişdeleri bilen aragatnaşyk saklamagynyň maksatlary, ýörelgeleri we ýollary barada giňişleýin gürrüň edildi.
Şeýle hem okuw maslahatynda pandemiýa bilen baglanyşykly meseleleri şöhlelendirmekde media habarlarynyň görnüşleriniň, ilata maglumatlary çalt we gaýragoýulmasyz ýetirmegiň aýratynlyklarynyň, habarlary seljermegiň, galp maglumatlara garşy göreşmegiň ýollarynyň, makalalaryň, interwýularyň, reportažlaryň täsirliligini ýokarlandyrmagyň tärleriniň, olary gazet-žurnallarda talabalaýyk ýerleşdirilmeginiň usullarynyň üstünde durlup geçildi.
Okuw maslahatynyň dowamynda oňa gatnaşyjylar degişli meseleler boýunça özara pikir alyşdylar.
Aziza Hudaýnazarowa,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.