“Osman döwletiniň daşary syýasaty we diplomatiýasy” atly tema boýunça umumy okuw sapagy
2022-nji ýylyň 14-nji martynda Türkmenistanyň Daşary işler ministrliginiň Halkara gatnaşyklary institutynda Ýaş diplomatlaryň mekdebiniň guramagynda «Parahatçylygyň ýaş çaparlary» atly akyl-paýhas bäsleşiginiň I saýlama tapgyrynyň 6-njy oýnuna gatnaşýan mekdep okuwçylary üçin “Osman döwletiniň daşary syýasaty we diplomatiýasy” atly tema boýunça umumy okuw sapagy geçirildi.
Okuw sapagynyň dowamynda okuwçylar indiki tapgyrda gerek bolan maglumatlar bilen has içgin tanyş boldular. Okuw sapagynyň dowamynda Türkmen döwlet maliýe institutynyň uly mugallymy Ahmet Annaberdiýew çykyş edip, okuwçylara Osman döwletiniň taryhy, içeri we daşary syýasaty, diplomatiýasy, şeýle-de medeniýeti barada gyzykly gürrüňleri berdi. Taryhda uly yz galdyran oguzlaryň kaýy boýundan bolan, 400 atlysy bilen Merwden Anadola göç eden Ärtogrul gazynyň nesilleri tarapyndan esaslandyrylan Osman imperiýasynyň alyp baran hoşniýetli daşary syýasaty barada edilen çykyşlar okuwçylarda uly gyzyklanma döretdi.
Okuw sapagynyň ahyrynda okuwçylara bäsleşigiň indiki tapgyrynda gerek bolan edebiýatlar maslahat berildi. Bäsleşik üçin ynamdar çeşmeleriň, edebiýatlaryň institutyň internet torundaky resmi saýtynda ýerleşdirilendigi görkezildi. Şeýle-de dowamly geçirilýän maslahat beriji okuw sapaklaryň, ýaryşlaryň netijesinde geljekki ýaş diplomatlary saýlap almak, olaryň ukyp-başarnyklaryny barlap görmek üçin uly ähmiýetiniň barlygy aýratyn bellenildi.
Maksat HALMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.
«Parahatçylygyň ýaş çaparlary» atly akyl-paýhas bäsleşiginiň I saýlama tapgyrynyň 6-njy oýnuna degişli edebiýatlar bilen şu ýerde tanşyp bilersiňiz: