Onlaýn açyk sapak geçirildi
2025-nji ýylyň 3-nji dekabrynda Myrat Garryýew adyndaky Türkmenistanyň Döwlet lukmançylyk uniwersitetinde “Bagyr sorujynyň döredýän keseli, onuň lukmançylykda we oba hojalykda ähmiýeti” atly onlaýn açyk sapak geçirildi. Oňa sanly ulgam arkaly Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyp ýaşlary hem işjeň gatnaşdylar.
Bu sapak, diňe bir ylmy çeşmeleri öwretmek bilen çäklenmän, eýsem, göze görünmeýän parazitiň ynsan we haýwanlaryň saglygy üçin nähili çuňňur ähmiýete eýedigini aýdyň görkezdi. Bu ýerde, açyk sapaga gatnaşyjylar gigiýenanyň inçe serhetlerini we oba hojalygyň ykdysady howpsuzlygyny goramagyň nähili möhüm bir wezipe bolup durýandygyna düşündiler.
Çykyş edenler keselleriň öňüni almakda sagdyn iýmitlenmegiň ornunyň uludygyny aýratyn bellediler. Şunda Gahryman Arkadagymyzyň ýolbaşçylygynda işlenip düzülen «Saglyk» Döwlet maksatnamasynyň ähmiýeti hem nygtaldy. Açyk sapaga gatnaşyjylar milli saglygy goraýyş ulgamynda düýpli özgertmeleri durmuşa geçirip, halkymyzyň saglygyny goramaga aýratyn üns berýän Milli Liderimize hem-de hormatly Prezidentimize tüýs ýürekden sagbolsun aýtdylar. Şeýle açyk sapaklaryň yzygiderli geçirilmegi ýaşlaryň arasynda sagdyn durmuş ýörelgesini wagyz etmekde möhüm ähmiýete eýedir.
Aýgözel AMANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.