OKUW SAPAKLARYNYŇ NOBATDAKY TAPGYRY BAŞLANDY
2024-nji ýylyň 20-nji martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda suw diplomatiýasy ugry boýunça okuw sapaklarynyň nobatdaky tapgyry başlandy. Okuw sapagyny Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň mugallymy Aýjan Omarowa alyp bardy.
Bu okuw sapagy «Türkmen halkynyň Milli Lideri Gahryman Arkadagymyzyň Birleşen Milletler Guramasynyň “Rio+20” maslahatynda we VII Bütindünýä suw forumynda öňe süren başlangyçlary» atly tema boýunça geçirildi. Okuw sapagynyň dowamynda Türkmenistanyň BMG-niň Baş Assambleýasynyň belent münberinden hem-de Rio-de-Žaneýro şäherinde geçirilen “Rio+20” Bütindünýä sammiti, tebigy betbagtçylyklaryň töwekgelçiligini peseltmek boýunça Sendaý şäherinde geçirilen Bütindünýä III maslahaty we Tegu şäherinde geçirilen VII Bütindünýä suw forumy ýaly iri halkara maslahatlarynda yglan edilen anyk başlangyçlary dogrusynda giňişleýin gürrüň berildi. Bütindünýä suw forumy suwa degişli möhüm meseleleri köptaraplaýyn ara alyp maslahatlaşmak hem-de hyzmatdaşlyk etmek boýunça özboluşly çäre bolmak bilen, şu wajyp ulgamdaky innowasion başlangyçlary we nou-haulary öňe sürdi. Sapagyň ahyrynda talyplar özlerini gyzyklandyrýan sowallar dogrusynda mugallym bilen pikir alyşdylar.
Mäneguly ÖWEZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.