Okuw sapaklarynyň nobatdaky tapgyry başlandy
2022-nji ýylyň 29-njy sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda suw diplomatiýasy ugry boýunça okuw sapaklarynyň nobatdaky tapgyry başlandy. Okuw sapagyny Türkmenistanyň Daşary işler ministrliginiň Halkara guramalary departamentiniň geňeşçisi Magtymguly Akmyradow alyp bardy. Bu okuw sapagy «Merkezi Aziýada suw diplomatiýasynyň orny» atly tema boýunça geçirildi. Okuw sapagynyň dowamynda BMG-niň tebigaty goramak boýunça möhüm ylalaşyklaryny, şol sanda, biologik dürlülik, ozon gatlagyny goramak, serhetüsti suw akymlaryny we halkara kölleri goramak hem-de peýdalanmak hakyndaky Konwensiýalarynyň, suw-batgalyk ýerleri hakyndaky Ramsar, çölleşmä garşy göreş boýunça Konwensiýalarynyň ähmiýeti dogrusynda giňişleýin gürrüň berildi. Söhbetdeşligiň dowamynda talyp ýaşlar halypa diplomata özlerini gyzyklandyrýan sowallar bilen ýüzlendiler.
Töfe HOŞANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara jemagat hukugy ugrunyň magistranty