OKUW SAPAKLARYNYŇ NOBATDAKY TAPGYRY BAŞLANDY
2024-nji ýylyň 2-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda Suw diplomatiýasy ugry boýunça okuw sapaklarynyň nobatdaky tapgyry başlandy. Okuw sapagyny Mejlisiň deputaty, Türkmenistanyň Mejlisiniň Daşky gurşawy goramak, tebigatdan peýdalanmak we agrosenagat toplumy baradaky komitetiniň agzasy, Oba hojalyk ylymlarynyň kandidaty A.Seýdibaýewiň alyp barmagynda Türkmenistanyň diplomatiýasynyň möhüm ugurlary boýunça okuw merkezinde “10-njy Bütindünýä Suw forumy: suw ýetmezçiligine garşy hereket etmegiň kanunçylyk esaslaryny we ygtybarly suw üpjünçiligi ýola goýmakda parlament hyzmatdaşlygy we abadançylygy üpjün etmekde tagallalar” atly tema boýunça umumy okuw sapagy geçirildi.
Okuw sapagyna Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, S.A.Nyýazow adyndaky Türkmen oba hojalyk uniwersitetiniň we Türkmenistanyň Daşary işler ministrliginiň Halkara gatnaşyklary institutynyň talyplary gatnaşdylar.
Okuw sapagynyň dowamynda Türkmenistanyň Mejlisiniň deputaty şu ýylyň 19-21-nji maýy aralygynda Türkmenistanyň Mejlisiniň wekiliniň Indoneziýa Respublikasynyň Bali şäherinde indoneziýa Respublikasynyň Wekiller Palatasynyň we Parlamentara Bileleşiginiň bilelikde guramagynda 10-njy Bütindünýä Suw Forumynyň çäklerinde geçirilen duşuşygynda suw babatda garalan meseleler boýunça gürüüň berdi. Şeýle hem, ýurdumyzda suw ýetmezçiligine garşy hereket etmegiň kanunçylyk esaslaryny berkitmek, ygtybarly suw üpjünçiligini ýola goýmakda parlament hyzmatdaşlygyny berkitmek, suw babatda ählumumy howpsuzlygy we abadançylygy üpjün etmekde halkara tagallalary birleşdirmek boýunça alnyp barylýar işler dogrusynda giňişleýin gürrüň berdi. Sapagyň ahyrynda talyplar özlerini gyzyklandyrýan sowallar dogrusynda mugallym bilen pikir alyşdylar.
Kerwen BABAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.