Institutymyzda Iňlis dili hepdeligi öz işine başlady
2023-nji ýylyň 21-nji fewralynda Türkmenistanyň Daşary işler ministrliginiň Halkara gatnaşyklary institutynda Iňlis dili hepdeligi başlandy. Geçirilýän ders hepdeliginiň esasy maksady talyplaryň daşary ýurt dilini öwrenmäge bolan islegini we höwesini ýokarlandyrmakdan, dünýägaraýşyny giňeltmekden, medeni derejesini ýokarlandyrmakdan, aň-bilim we döredijilik işjeňligini ösdürmekden ybaratdyr. Dünýä dilleri kafedrasy tarapyndan gurnalan hepdeligiň çäginde birnäçe çäreler meýilleşdirildi.
21-nji fewralda, ýagny Iňlis dili hepdeliginiň birinji gününde “Öwrenilýän diliň ýurdy bilen tanyşlyk" atly çäre geçirildi. Ähli fakultetleriň talyplarynyň gatnaşmagynda “Beýik Britaniýa bilen Türkmenistanyň arasyndaky syýasy-diplomatik gatnaşyklar”, “Beýik Britaniýa: dil, medeniýet, däp-dessurlar”, “Beýik Britaniýanyň bilim ulgamy we ýokary okuw jaýlary”, “Beýik Britaniýanyň gözel ýerleri” atly temalarda prezentasiýaly çykyşlar edildi. Talyplar tarapyndan ýerine ýetirilen iňlis dilindäki goşgular, aýdymlar, şeýle hem, iňlis edebiýatynyň nusgawy eserlerinden monologlar çärä aýratyn öwüşgin çaýdy.
Institutyň baş binasynyň girelgesinde gurnalan sergi meýdançasy çärä baýramçylyk ruhuny berdi.
Institutymyza berkidilen umumy bilim edaralary bilen özara gatnaşyklary çuňlaşdyrmak maksady bilen, bu çärä paýtagtymyzyň 65-nji we 68-nji mekdepleriň okuwçylary we mugallymlary hem çagyryldy.
Umuman, hepdäniň ilkinji çäresi talyplaryň iňlis dilini özleşdirmegiň dowamynda alan bilim, dil we sözleýiş tejribesiniň giňelmegine we baýlaşmagyna, dersara baglanyşyklary berkitmäge ýardam etdi.
Aýna SÄTGELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.