“EMELI AŇYŇ” HALKARA HUKUK ÄHMIÝETINE BAGYŞLANAN OKUW SAPAGY GEÇIRILDI
2025-nji ýylyň 13-nji noýabrynda Türkmenistanyň Daşary işler ministrliginiň Halkara gatnaşyklary institutynda Halkara hukugy we deňeşdirme hukuk öwreniş kafedrasynyň mugallymy Gülsenem Hommadowanyň alyp barmagynda «Emeli aňy ornaşdyrmakda halkara kanunlaryň ähmiýeti» barada okuw sapagy geçirildi. Okuw sapagyna institutyň talyp ýaşlary gatnaşdylar.
Okuw sapagynda emeli aň tehnologiýalarynyň häzirki zaman dünýäsindäki orny, onuň hukuk taýdan düzgünleşdirilmegi we halkara hukuk kadalarynyň ähmiýeti jikme-jik ara alnyp maslahatlaşyldy. Bulardan başga-da emeli aňyň jemgyýete giňden ornaşdyrylmagynyň ykdysadyýetden başlap, ylmy-barlag we tehnologiýa ulgamlaryna çenli köp ugurlara täsir edýändigi barada bellenildi. Şeýle-de emeli aňy düzgünleşdirmekde halkara hyzmatdaşlygynyň zerurdygy nygtaldy we halkara tejribelerden mysallar getirilip, emeli aň bilen baglylykda ýüze çykýan hukuk meseleleri boýunça anyk garaýyşlar beýan edildi.
Okuw sapagynyň ahyrynda emeli aň tehnologiýalarynyň hukuk esaslarynyň ösüşini gazanmakda halkara gatnaşyklarynyň ösdürilmeginiň möhümdigi barada umumy netijä gelindi. Şeýle çäreleriň Türkmenistanyň ýaş hünärmenleriniň hukuk we tehnologiýa ugrundaky bilimlerini giňeltmekde möhüm ädim bolup durýandygy bellenildi. Bu çäre Türkmenistanyň emeli aňy ösdürmek we onuň halkara hukuk kadalaryna laýyk ornaşdyrylmagy babatdaky ygrarlylygyny görkezýän nobatdaky möhüm başlangyçlardan biri boldy.
Leýli ARAPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy
fakultetiniň 5-nji ýyl talyby.