ADAM HUKUKLARY BOÝUNÇA OKUW MASLAHATY GEÇIRILDI
2025-nji ýylyň 10 – 14-nji noýabry aralygynda Ýewropada Howpsuzlyk we Hyzmatdaşlyk Guramasynyň Aşgabatdaky Merkeziniň guramagynda Türkmenistanyň Daşary işler ministrliginiň Halkara gatnaşyklary institutynda “Jenaýat hukuk ulanyşynda adam hukuklary boýunça halkara standartlarynyň berjaý edilişi” atly okuw maslahaty geçirildi. Oňa Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Içeri işler ministrliginiň institutynyň hem-de Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň talyplary gatnaşdylar.
Okuw maslahatynyň açylyşynda ÝHHG-niň Aşgabatdaky Merkeziniň baştutanynyň wezipesini wagtlaýyn ýerine ýetiriji Rüne Kastberg giriş sözi bilen çykyş etdi. Soňra adam hukuklary boýunça Moldowa Respublikasyndan gelen halkara bilermenler Ýuriý Lewinte, Ion Graur şeýle-de, Weronika Wition çykyş edip, Adam hukuklarynyň taryhy ösüşi, azatlyklary we hukuklary, jenaýat agtaryş döwründe olara berilýän hukuk kömekler, agtaryş işiniň halkara standartlary, agyr gynamalara garşy göreş we kepillikler, jezasyzlyga garşy göreş, tussaglykda saklamaklygyň tertibi, adamlaryň adalatly kazyýet goragyna bolan hukuklary dogrusynda gürrüň berdiler.
Bu okuw maslahaty ÝHHG guramasy tarapyndan däp bolşy ýaly, her ýylda geçirilip, Adam hukuklarynyň Halkara gününe bagyşlanýar. Talyplaryň okuw maslahatyna işjeň gatnaşmagy bu ugurda olaryň bilim we ukyp-başarnyklarynyň ösmegine itergi berdi.
Ogulsuraý GURBANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy
fakultetiniň III ýyl talyby.