Güýzüň şahyryna bagyşlandy
2025-nji ýylyň 16-njy oktýabrynda Türkmenistanyň Daşary işler ministrliginiň Halkara gatnaşyklary institutynda «Ýaş žurnalistler» ylmy-döredijilik gurnagynyň hem-de «Ýaş diplomatyň sesi» elektron gazetiniň redaksiýasynyň bilelikde guramagynda Gurbannazar Ezizowyň ömri we döredijiligine bagyşlanan döredijilik agşamy geçirildi. Oňa Türkmenistanyň halk artisti Atageldi Garýagdyýew, şahyryň uly gyzy Ýazgül Ezizowa, şeýle-de institutyň mugallymlarydyr talyp ýaşlary gatnaşdylar.
Döredijilik agşamynda, ilki bilen, Ýazgül Ezizowa çykyş edip, türkmen edebiýatynda öçmejek yz goýan şahyr hakynda gyzykly hem-de ýakymly ýatlamalary gürrüň berdi. Elbetde, syrly dünýä ýaly bolup, söýgüli şahyrymyzyň şahsyýeti-de, edebiýata gelşi-de, döredijilik aýratynlygy-da hemmeleri gyzyklandyrýar. Şoňa görä-de, şahyr bilen bagly gürrüňler duşuşyga gatnaşyjylara ýatdan çykmajak täsirleri bagyşlady.
Çykyş edenleriň nygtaýşy ýaly, Gurbannazar Ezizow öz şygyrlary bilen türkmen şygryýetine pikir taýdan-da, onuň aýdylyşy jähetden-de, düzüliş babatda-da täzelikleri getirdi. Bary-ýogy otuz bäş ýaşyň içinde tutuş bir halkyň şygryýetinde mekdep derejesine ýetmek diýseň seýrek hadysa. Şonuň üçinem Gurbannazar şahyryň şygyrlary bu günki gün her bir öýde, her bir türkmeniň kalbynda ýaşaýar.
Duşuşykda şahyryň ömür ýoly dogrusynda hem söhbet edildi. Ýeri gelende bellesek, Gurbannazar Ezizow 1940-njy ýylyň 1-nji martynda Gökdepe etrabynyň Söwütli obasynda Azyz (Abdylazyz) Hümmedowyň maşgalasynda dünýä inýär. Ol 1964-nji ýylda Magtymguly adyndaky Türkmen döwlet uniwersitetiniň türkmen filologiýasy fakultetini tamamlaýar. Soňra «Mydam taýýar» gazetiniň, «Pioner» žurnalynyň edebi işgäri, «Edebiýat we sungat» gazetiniň poeziýa bölüminiň müdiri, Türkmenistanyň ýazyjylar birleşiginde ýaş şahyrlaryň maslahatçysy wezipelerinde işleýär. Şahyr işiniň daşyndan zergärçilik bilen hem meşgullanyp, nepis şaý-sepleri ýasaýar.
Soňra aýdym-saz muşdaklarynyň arasynda «Altyn bariton» adyny alan Atageldi Garýagdyýew şahyr dosty bilen bagly başdangeçirmelerini bu ýere ýygnananlar bilen paýlaşdy. Ýeri gelende aýtsak, Atageldi Garýagdyýewiň şahyryň sözlerine, meşhur kompozitor Nury Halmämmedowyň sazlaryna döredilen aýdymlaryny ýerine ýetirmegi döredijilik agşamynyň ähmiýetini has-da artdyrdy.
Türkmenistanyň halk ýazyjysy, şahyr, dramaturg Gurbannazar Ezizowyň ömri we döredijiligine bagyşlanan duşuşygyň dowamynda institutyň Halkara žurnalistikasy fakultetiniň talyplary — Begnazar Begnazarowyň hem-de Peristan Töräýewanyň ýerine ýetirmeginde joşgunly aýdymlar ýaňlandy. Şeýle-de «Ýaş žurnalistler» ylmy-döredijilik gurnagynyň agzalary şahyryň hakydalarda baky orun alan goşgularyny labyzly okadylar.
Döredijilik duşuşygynyň ahyrynda oňa gatnaşyjylar türkmen edebiýatynda öçmejek yz goýan şahsyýetleriň döredijilikleriniň içgin öwrenilmegi ugrunda giň mümkinçilikleri döredip berýän Gahryman Arkadagymyza hem-de Arkadagly Gahryman Serdarymyza hoşallyk sözlerini beýan etdiler.
Jahantäç GURBANGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.