«EKOLOGIÝA ÜÇIN 500 SÖZ» ATLY REFERAT BÄSLEŞIGI GEÇIRILDI
2024-nji ýylyň 13-nji martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň «Suw diplomatiýasy» ugrunyň we «Ýaş hukukçylar» ylmy gurnagynyň yglan eden «Ekologiýa üçin 500 söz» atly referat bäsleşiginiň jemleri jemlendi. Bäsleşigiň esasy maksady BMG-niň Howanyň üýtgemegi boýunça Çarçuwaly konwensiýasynyň kabul edilmeginiň we howanyň üýtgemegine garşy göreşmegiň ähmiýetini talyp ýaşlaryň arasynda wagyz etmekden ybaratdyr. Bäsleşigiň netijeleri boýunça I orna Halkara ykdysady gatnaşyklary fakultetiniň III ýyl talyby Erem Döwletmyradow, II orna Halkara hukugy fakultetiniň I ýyl talyby Süleýman Nurgeldiýew we III orna Halkara gatnaşyklary fakultetiniň III ýyl talyby Aýgül Meredowa mynasyp boldular.
Bilşimiz ýaly, ösüp gelýän ýaş nesillerde tebigaty goramak, onuň gymmatlyklaryna aýawly çemeleşmek we hormat goýmak ýörelgelerinde terbiýe bermek, ýaş nesilleriň arasynda ekologik medeniýetiň derejesini ýokarlandyrmak döwletimiziň ileri tutýan esasy ugurlarynyň biridir. Biz, ýaşlara şeýle mümkinçilikleri döredip berýän türkmen halkynyň Milli Lideri, Gahryman Arkadagymyza we hormatly Prezidentimiz Arkadagly Gahryman Serdarymyza sagbolsun aýdýarys. Türkmen halkynyň Milli Lideri, Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli, umumadamzat ähmiýetli işleri hemişe rowaçlyklara beslensin!
Nowruz MYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.