DAŞKY GURŞAWY GORAMAK WE SUW DIPLOMATIÝASYNA BAGYŞLANAN DUŞUŞYK GEÇIRILDI
2024-nji ýylyň 23-nji dekabrynda Türkmenistanyň we Somali Federatiw Respublikasynyň ýokary okuw mekdepleriniň professor-mugallymlarynyň gatnaşmagynda daşky gurşawy goramak we suw diplomatiýasyna bagyşlanan göni wideoaragatnaşyk arkaly duşuşyk geçirildi. Bu onlaýn duşuşyga Magtymguly adyndaky Türkmen döwlet uniwersitetiniň, S.A.Nyýazow adyndaky Türkmen oba hojalyk uniwersitetiniň professor-mugallymlary bilen bir hatarda Türkmenistanyň Daşary işler ministrliginiň Halkara gatnaşyklary institutynyň mugallymlary hem gatnaşdylar. Duşuşykda institutyň Halkara hukugy we deňeşdirme hukuk öwreniş kafedrasynyň mugallym-öwrenijisi Meýlis Gylyşaýew “Merkezi Aziýada suw diplomatiýasynyñ ähmiýeti” we Halkara ykdysady gatnaşyklary kafedrasynyň mugallymy Nazar Meredow “Ykdysadyýet howanyň üýtgemegine garşy gural hökmünde” atly temalary bilen çykyş etdiler. Somali Federatiw Respublikasy tarapyndan bolsa Mogadişu uniwersitetiniň we Somali milli uniwersitetiniň wekilleri gatnaşdylar. Duşuşygyň barşynda gatnaşyjylar daşky gurşawy goramagyň we suw diplomatiýasynyň ähmiýetini belläp, özara pikir alyşdylar.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň uly mugallymy.