DAŞARY ÝURTLARDA MUGALLYMLAR HÜNÄRLERINI KÄMILLEŞDIRDILER
2024-nji ýylyň 24-nji oktýabrynda Türkmenistanyň Daşary işler ministrliginiň Halkara gatnaşyklary institutynda daşary ýurtda okuw saparynda bolan mugallymlaryň gatnaşmaklarynda saparyň jemlerine bagyşlanan maslahat geçirildi. Bu maslahatda çykyş eden mugallymlar Gazagystan Respublikasynda «Sözbaşynyň aňyrsynda: metbugat azatlygyny öňe sürmek üçin žurnalistleri goramak», Koreýa Respublikasynda «Aziýanyň adam hukuklary boýunça ýerli dolandyryş edaralarynyň bilimini ýokarlandyrmak», Hytaý Halk Respublikasynda «Ulag – logistika ösüşiň möhüm pudagy», «Ýewraziýa ýurtlary üçin parahatçylyk we howpsuzlyk ugry babatda hyzmatdaşlyk», Russiýa Federasiýasynda «Tomusky uniwersitet -2024», «Ýewraziýa Global» IX halkara ýaşlar forumy, Gruziýanyň Suhumi döwlet uniwersitetinde Magtymguly Pyragynyň adyny göterýän okuw otagynyň açylyş dabarasyna, şeýle-de halkara maslahatlara we okuw saparlaryna gatnaşandyklary barada giňişleýin beýan etdiler. Maslahatyň dowamynda dünýä tejribesinde öwrenen maglumatlaryny slaýdlaryň üsti bilen gürrüň berdiler. Şeýle-de okuw saparynda mugallymlar özlerinde galan täsiri we dünýäni görmek üçin berlen mümkinçiligiň ähmiýeti barada belläp geçdiler. Bu mümkinçilikden peýdalanan mugallymlaryň bilimlerini has hem kämilleşdirjekdiklerine we toplan tejribelerini geljekde halkara gatnaşyklarynyň çäginde iş ýüzünde ulanjakdyklaryna ynanýarys.
Maslahatyň ahyrynda mugallymlar Gahryman Arkadagymyza we Arkadagly Gahryman Serdarymyza ýurdumyzyň bilim ulgamyny ösdürmek ugrunda döredip berýän mümkinçilikleri üçin ýürek buýsançlaryny beýan etdiler we alkyş sözlerini aýtdylar.
Perhat ÇARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň uly mugallymy.