ÝUNESKO klubynyň nobatdaky maslahaty
2024-nji ýylyň 19-njy aprelinde Türkmenistanyň Daşary işler ministrliginiň Halkara gatnaşyklary institutynyň “Parahatçylyk medeniýeti” atly ÝUNESKO klubynyň nobatdaky maslahaty geçirildi. Klubyň işjeň agzalarynyň gatnaşmagynda geçirilen maslahatda alnyp baryljak işler dogrusynda käbir meseleler ara alnyp maslahatlaşyldy. Maslahatda “Parahatçylyk medeniýeti” atly ÝUNESKO kluby tarapyndan geçirilýän çäreleriň diňe institutyň web saýtynda däl, eýsem, beýleki onlaýn sahypalarynda hem ýaýbalaňdyrylmalydygy barada bellenilip geçildi. Klubyň Aragatnaşyk we metbugat habarçysy Halkara žurnalistikasy fakultetiniň II ýyl talyby K. Akmyradow şular dogrusynda çykyş edip,”Parahatçylyk medeniýeti” atly ÝUNESKO klubynyň alyp barýan işlerini, geçirilýän çäreleri wagyz etmek boýunça köpçülikleýin habar beriş serişdelerinde ýaýbaňlandyrylmagynyň artdyrylmagy barada belläp geçdi.
Şeýle hem maslahatda türkmen diplomatiýasynyň milli mekdebiniň binýadynda hereket edýän ÝUNESKO kluby tarapyndan geçirilýän bäsleşiklere maslahatlara mekdep okuwçylarynyň hem gatnaşmaklaryny üpjün etmek hakynda bellenildi. Bular barasynda ÝUNESKO klubynyň Geňeşiniň kätibi, Halkara gatnaşyklary fakultetiniň II ýyl talyby Mähriban Amannazarowa çykyş etdi. Ol öz çykyşynda “Parahatçylyk medeniýeti” atly ÝUNESKO klubynyň agzalygyna kabul edilen mekdep okuwçylarynyň sanynyň artdyrylmalydygy we olaryň ýurdumyzyň ÝUNESKO bilen gatnaşyklary hakynda bilimlerini ösdürmek maksady bilen olary has işjeň çekilmelidigi dogrusynda belläp geçdi.
Sumaýa NURYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.