YLYM — INNOWASION ÖSÜŞIŇ BINÝADY
2024-nji ýylyň 7-nji iýunynda Türkmenistanyň Daşary işler ministrliginiň Halkara gatnaşyklary institutynda Ylymlar güni mynasybetli ylmy-amaly maslahat geçirildi. «Ylym we tehnologiýalar ýurdumyzyň şu günki hem-de geljekki ösüşleriniň esasydyr» ady bilen geçirilen bu ylmy-amaly maslahata ýurdumyzyň ylmy jemgyýetçiliginiň wekilleri, alymlar, ylmy işgärler, professor-mugallymlar we talyp ýaşlar gatnaşdylar.
Maslahatyň umumy mejlisinde ýurdumyzda ylmyň dürli ugurlarynyň ösüş aýratynlyklary, ylymly ýaşlary ýetişdirmekde innowasion usullary ulanmagyň ähmiýeti, bular babatda dünýäniň öňdebaryjy tejribesi, şeýle hem halkara gatnaşyklarynda, döwletara hyzmatdaşlyklarda ylmyň orny, ylmy diplomatiýanyň gazananlary dogrusynda giňişleýin çykyşlar edildi. Çykyş eden ylmy wekiller, professor-mugallymlar ylmyň innowasion ösüş ýolunyň esaslaryny kämilleşdirmegiň wajyplygyny, halkara gatnaşyklary ulgamynda hem ylmyň mümkinçiliklerini peýdalanmak boýunça täze garaýyşlaryň kemala getirilmeginiň zerurdygyny nygtadylar.
Umumy mejlis tamamlanandan soňra, ylmy-amaly maslahat öz işini «Berkarar döwletiň täze eýýamynyň Galkynyşy döwründe ýurdumyzyň ylym ulgamyny kämilleşdirmekde halkara tejribe», «Ylym ulgamyny ösdürmekde ýaşlaryň goşandy», «Ylym we innowasion tehnologiýalar — Watanymyzyň ösüşiniň özeni», «Ylym-bilim ulgamyny kämilleşdirmek innowasion ösüşiň esasy ugrudyr» atly 4 sany bölümçede dowam etdi.
Ylymlar güni mynasybetli geçirilen ylmy-amaly maslahatyň işi üstünlikli jemlenip, oňa gatnaşyjylar türkmen ýaşlaryna ylym bilen meşgullanmaga ähli mümkinçilikleri döredip berýän Gahryman Arkadagymyza hem-de Arkadagly Gahryman Serdarymyza alkyş sözlerini beýan etdiler.
Yslam GURBANMYRADOW,
Türkmenistanyň Daşary işler minsitrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.