Ylmy-okuw maslahaty geçirildi
2025-nji ýylyň 30-njy aprelinde Myrat Garryýew adyndaky Türkmenistanyň Döwlet lukmançylyk uniwersiteti ýokanç keselleriň ösüşini we ýaýramagyny şertlendirýän töwekgelçilikleriň öz wagtynda ýüze çykarylmagyna, işjeň bejerilmegine we bejergi döwründe yzygiderli gözegçiligi ýola goýmak maksady bilen "Pasyllaýyn keseller we olaryň öňüni almagyň usullary" atly onlaýn ylmy-okuw maslahaty geçirildi. Oňa institutyň talyp ýaşlary, Türkmenistanyň ýokary we orta hünär okuw mekdepleriniň mugallymlary we talyplary sanly ulgam arkaly gatnaşdylar.
Maslahatda Myrat Garryýew adyndaky Türkmenistanyň Döwlet lukmançylyk uniwersitetiniň Ýokanç keseller kafedrasynyň assistenti Keýik Öwezdurdyýewa "Pasyllaýyn kesellerde ýiti respirator keselleriň geçiş aýratynlyklary", şol uniwersitetiň assistenti Zöhre Çaryýewa "Çagalarda pasyllaýyn keselleriň geçiş aýratynlygy", şol uniwersitetiň mugallymy Gunça Akyýewa "Möwsümleýin kesellerde epidemiology öňüni alyş çäreleri" barada çykyş etdiler.
Ýurdumyzda dünýä ülňülerine laýyklykda ylmy-barlag işleri alnyp barylýar we gazanylýan üstünlikler, täze anyklaýyş, bejeriş usullary amaly lukmançylyk tejribesine ornaşdyrylýar. Munuň özi ýurdumyzda pasyllaýyn keseller bilen keselçiligiň mundan beýläk-de azalmagyna we ýok bolmagyna ýardam eder.
Ýazjeren TIRKIŞOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.