ÝEŇIŞ GÜNI MYNASYBETLI YLMY-AMALY MASLAHAT GEÇIRILDI
2026-njy ýylyň 5-nji maýynda Türkmenistanyň Daşary işler ministrliginiň Halkara gatnaşyklary institutynda 1941-1945-nji ýyllaryň Beýik Watançylyk urşunda gazanylan Ýeňşiň 81 ýyllygy mynasybetli «Pederlerimiziň gahrymançylygy – ýaşlary watansöýüjilik ruhunda terbiýelemegiň beýik mekdebi» atly ylmy-amaly maslahaty geçirildi. Masahata Türkmenistanyň Döwlet, hukuk we demokratiýa institutynyň wekilleri, Türkmenistanyň Daşary işler ministrliginiň Halkara gatnaşyklary institutynyň hem-de ýurdumyzyň beýleki ýokary okuw mekdepleriniň mugallymlary we talyplary gatnaşdylar.
Maslahatyň umumy mejlisinde Türkmenistanyň Döwlet, hukuk we demokratiýa institutynyň bölüm başlygy Meretguly Tangiýew «Watana, halka wepalylyk — belent jogapkärçilik», Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň mugallymy Güljahan Amanberdiýewa ««Halk hakydasy» ýadygärlikler toplumynyň türkmen taryhyny öwrenmekdäki ähmiýeti», Žurnalistikanyň nazaryýeti we amalyýeti kafedrasynyň mugallym-öwrenijisi Ogulbike Ymamberdiýewa «Türkmen ýazyjy şahyrlarynyň eserlerinde watançylyk temasynyň şöhlelendirilişi», Halkara ykdysady gatnaşyklary fakultetiniň 5-nji ýyl talyby Batir Sadullaýew «Beýik Watançylyk urşy ýyllarynda Türkmenistanyň durmuş — ykdysady ýagdaýy» atly temalar boýunça çykyş etdiler.
Ylmy-amaly maslahatyň işi umumy mejlisden soň «Watançylyk, mertlik, gaýduwsyzlyk — türkmen halkynyň ahlak ýörelgesi», «Pederleriň gahrymançylygy ynsanperwerligiň beýik nusgasydyr», «Merdana halkymyzyň gahrymançylygy — nesilleriň buýsanjy» atly bölümçelerde ýaşlary watansöýüjilik ruhunda terbiýelemek, Watan mukaddesligi, asuda Watanymyzyň ösüş aýratynlyklary we halkara hyzmatdaşlygy barada köp sanly çykyşlar diňlenildi.
Biziň asyrlar aşan gymmatlygymyz hem-de mirasymyz täze taryhy döwürde ygtybarly binýada öwrülip, ýurdumyz onuň üstünde öz bagtly geljegini gurýar. Hatyra hem-de milli gahrymanlary hemişe ýatlamak däbi türkmen jemgyýetiniň mizemez sütünleriniň biridir.
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň uly mugallymy.