Ýeňiş güni mynasybetli geçirilen ylmy-amaly maslahat
2022-nji ýylyň 5-nji maýynda Türkmenistanyň Daşary işler ministrliginiň Halkara gatnaşyklary institutynda 1941-1945-nji ýyllaryň Beýik Watançylyk urşunda gazanylan Ýeňşiň 77 ýyllygy mynasybetli «Watan goragçylarynyň belent edermenligi ýaşlar üçin merdanalygyň nusgasydyr» atly ylmy-amaly maslahaty geçirildi. Maslahata Türkmenistanyň Döwlet, hukuk we demokratiýa institutynyň wekilleri, Türkmenistanyň Daşary işler ministrliginiň Halkara gatnaşyklary institutynyň hem-de beýleki ýokary okuw mekdepleriniň mugallymlary we talyplary şeýle-de «Ýaş diplomatlar» mekdebiniň işjeň agzalary bolan mekdep okuwçylary gatnaşdylar.
Maslahatyň umumy mejlisinde Türkmenistanyň Döwlet, hukuk we demokratiýa institutynyň esasy ylmy işgäri Meretguly Tangiýew «Gahrymanlaryň gaýduwsyzlygy – Watana wepalylygyň beýik nusagy», Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň mugallymy Batyr Kairow «Dialog – parahatçylygyň kepili» filosofiýasy – bagtyýar geljegiň binýady», institutyň Žurnalistikanyň nazaryýeti we amalyýeti kafedrasynyň mugallymy Miwe Nabatowa «Pederleriň göreldesi – nesilleriň ýörelgesi» hem-de institutyň Halkara žurnalistikasy fakultetiniň 1-nji ýyl talyby Gurbansähet Gurbansähedow «Watan, saňa gulluk ömrüň manysy!» atly temalar boýunça çykyş etdiler.
Ylmy-amaly maslahatyň umumy mejlisinden soň öz işini bölümçelerde dowam etdirdi. «Parahatsöýüjilik türkmen halkynyň ýol-ýörelgesiniň binýady», «Beýik Watançylyk urşunyň döwletleriniň ykdysady ýagdaýyna täsiri», «Gahryman pederlerimiziň şöhratly ýeňişi eşretli gelejegimiziň kepilidir» atlary bilen geçirilen bölümçelerde bolsa Beýik Ýeňşiň, watansöýüjilik ýörelgesiniň, Watan mukaddesliginiň, häzirki zamanda parahatçylyk, howpsuzlyk, ykdysady ösüşleriň ähmiýeti we täsiri barada köp sanly çykyşlar diňlenildi.
Dünýä taryhyna örän pajygaly döwür hökmünde giren 1941-1945-nji ýyllarda hem bu mukaddes kadalara berk eýeren merdana watandaşlarymyz doganlyk halklaryň wekilleri bilen egin-egne berip, aldym-berdimli söweş meýdanlarynda batyrlygyň, Watançylygyň belent nusgasyny görkezdiler, nesilleriň hormatyna mynasyp boldular.
Watanymyzyň azatlygyny, garaşsyzlygyny gorap saklan edermen, gaýduwsyz ata-babalarymyzyň şan-şöhraty halkymyzyň taryhyna girip, ol milli gahrymanlarymyzyň atlary “Hatyra” we “Şöhrat” atly ýadygärlik kitaplarynda ebedileşdirildi.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.