Ýaş diplomatlaryň mekdebiniň agzalarynyň arasynda Halkara Nowruz güni mynasybetli “Biziň ýerler – behişt ýerler, bu ýerler ...” atly fotosurat bäsleşi
Ýaş diplomatlaryň mekdebiniň agzalarynyň arasynda Halkara Nowruz güni mynasybetli “Biziň ýerler – behişt ýerler, bu ýerler ...” atly fotosurat bäsleşigini gurnamak we geçirmek hakyndaky
DÜZGÜNNAMA
Türkmenistanyň Prezidentiniň 2017-nji ýylyň 15-nji sentýabryndaky 340 belgili Karary bilen tassyklanan Türkmenistanda sanly bilim ulgamyny ösdürmegiň Konsepsiýasyny durmuşa ornaşdyrmagyň Meýilnamasyny ýerine ýetirmek, bilim ulgamynda innowasiýalary ornaşdyrmak, döwrebap žurnalistikany ösdürmek, hormatly Prezidentimiziň 2020-nji ýylyň 23-nji fewralynda hem-de 2021-nji ýylyň 9-njy fewralynda internet žurnalistikasyny, fotožurnalistikany ösdürmek boýunça beren tabşyryklaryny durmuşa geçirmek maksady bilen, Türkmenistanyň Daşary işler ministrliginiň Halkara gatnaşyklary institutynyň, Türkmenistanyň Magtymguly adyndaky Ýaşlar guramasynyň Aşgabat şäheriniň Bagtyýarlyk etrap Geňeşiniň bilelikde guramagynda Ýaş diplomatlaryň mekdebiniň agzalarynyň arasynda Halkara Nowruz güni mynasybetli “Biziň ýerler – behişt ýerler, bu ýerler...” atly fotosurat bäsleşigini geçirmek boýunça şu Düzgünnama işlenip taýýarlanyldy.
1. Umumy Düzgünler
Şu Düzgünnama Ýaş diplomatlaryň mekdebiniň agzalarynyň arasynda «Biziň ýerler – behişt ýerler, bu ýerler” atly fotosurat bäsleşigini (mundan beýläk – bäsleşik) guramagyň we geçirmegiň kadalaşdyryjy resminamasy bolup, ony geçirmegiň tertibini kesgitleýär.
Ýaş diplomatlaryň mekdebiniň agzalarynyň arasynda “Fotosurat” bäsleşigini geçirmek Türkmenistanyň köpçülikleýin habar beriş serişdeleriniň sanly ulgama geçýän şertlerinde ýaşlarymyzyň innowasion tehnologiýalaryny ulanmakda zehinli ýaşlary ýüze çykarmakda olaryň başarnyklaryny açyp görkezmekde ýardam eder.
Bäsleşigiň maksady:
a) Hormatly Prezidentimiziň alyp barýan hoşniýetli parahatçylyk dörediji daşary syýasy başlangyçlarynyň netijesinde Bitarap Türkmenistanyň ýeten ýokary halkara abraýyny, owadan ýerlerini şöhlelendirmek, ýurdumyzyň durmuş-ykdysady depginini fotosuratlarda, şekillerde şöhlelendirmek, teswirlemek;
b) Hormatly Prezidentimiziň 2021-nji ýylyň 9-njy fewralyndaky beren tabşyrygy esasynda ýurdumyzyň geljekki ýokary okuw mekdeplerinde žurnalistika we beýleki hünärlerde okajak okuwçylaryň arasynda fotožurnalistika bolan garaýyşlaryny, aň-düşünjelerini giňeltmek, ösdürmek bilen bir hatarda, tebigata, ýurdumyza hormat-söýgüni döretmek;
ç) fotožurnalistikanyň žanrlary boýunça surata düşürmek endiklerini kämilleşdirmek;
d) Ýaş diplomatlaryň mekdebiniň agzalarynyň arasynda hoşniýetli dostlukly gatnaşyklary berkitmek, islendik agzada fotosurata düşürmek ukybyny ýüze çykarmak.
Bäsleşigiň wezipesi:
a) geljekki ökde, ussat hem-de höwesjeň fotožurnalistleri hünäre höweslendirmek;
b) häzirki zaman tehnologiýalary ulanmak arkaly döredijilige bolan gyzyklanmany döretmek;
ç) zehinli we ukyply ýaşlary ýüze çykarmak, olaryň mundan beýläk intellektual ösüşi bilen bagly hünär saýlamaklaryna oňyn şertleri döretmek;
d) sanly maglumat-kommunikasiýa tehnologiýalary arkaly mekdep okuwçylarynyň özara aragatnaşygyny amala aşyrmak.
Bäsleşige ugradylýan suratlar şular esasynda bahalandyrylar:
a) suratyň tema bilen sazlaşygy;
b) bäsleşige ugradylan suratyň reňk öwüşginleri we sazlaşygy;
c) düşürilen suratyň aňladýan belli bir garaýşy we manysy;
d) suratyň düşüriliş tarapy.
2. Bäsleşigiň guramaçylyk-usulyýet üpjünçiligi
2.1. Ýaş diplomatlaryň mekdebiniň agzalarynyň arasynda fotosurat bäsleşigini guramak we geçirmek boýunça umumy ýolbaşçylygy amala aşyrmak üçin Guramaçylyk we Eminler topary döredilýär.
Guramaçylyk topary:
Ýaş diplomatlaryň mekdebiniň agzalarynyň arasynda fotosurat bäsleşigini geçirmegiň esasy ýörelgelerini kesgitleýär hem-de bäsleşigi guramak we geçirmek boýunça guramaçylyk işleri alyp barýar;
Eminler topary:
Ýaş diplomatlaryň mekdebiniň agzalaryndan gelip gowşan suratlara bellenilen talaplar boýunça adalatly bahalandyryp, ýeňijileri kesgitleýär.
3. Bäsleşigi guramagyň we geçirmegiň tertibi
3.1. Bäsleşige ýurdumyzyň islendik ýerinden Ýaş diplomatlaryň mekdebiniň agzalary bolan okuwçylar gatnaşyp biler.
3.2. Bäsleşige gatnaşyljak suratyň temasy:
a) “Biziň ýerler – behişt ýerler, bu ýerler...”;
b) “Gözlerimde Watan keşbi”;
ç) “Tebigat – biziň öýümiz”.
3.3. Bäsleşige gatnaşýan agza hgi.redaksiya@gmail.com elektron salga ugratmaly.
3.4. Bäsleşige gatnaşýan agza suraty özbaşdak düşürmeli, göçürilen bolmaly däl. Eger-de surat plagiat bolan ýagdaýynda bäsleşikden aýrylar.
3.5. Bäsleşige gatnaşýan agza bäsleşige birnäçe surat hödürläp biler. Hödürlenýän suratlar guramaçylyk toparynyň hgi.redaksiya@gmail.com elektron salgysyna 2025-nji ýylyň 10-njy martyna çenli ugradylmaly.
3.6. Bäsleşigiň eminler toparynyň düzümi ýurdumyzyň gazet-žurnallarynyň redaksiýalarynyň wekillerinden, halypa fotožurnalistlerden düzüler.
3.7. Eminler topary bäsleşige gatnaşýan agzalaryň işlerini bahalandyrýar we netijelerini jemleýär.
3.8. Islendik gatnaşyjynyň arz-şikaýat bilen ýüz tutmaga hukugy bardyr. Arz-şikaýat bilen eminler toparyna elektron salgy arkaly ýüz tutup biler.
3.9. Arz-şikaýatlara eminler topary tarapyndan seredilýär we ahyrky netijäni eminler toparynyň başlygy kesgitleýär, hem-de bu gutarnykly netije üýtgedilmäge degişli däldir.
4. “Biziň ýerler – behişt ýerler, bu ýerler...” atly fotosurat bäsleşiginiň ýeňijilerini
kesgitlemegiň we sylaglamagyň tertibi
4.1. Bäsleşigiň netijesi eminler tarapyndan toplanan ballaryň jemi boýunça kesgitlenýär.
4.2. Bäsleşigiň ýeňijileri: I, II, III ýerler diplomlar, şeýle hem Türkmenistanyň Magtymguly adyndaky Ýaşlar guramasynyň Bagtyýarlyk etrap Geňeşiniň gymmat bahaly ýadygärlik sowgatlary bilen sylaglanar.
4.3. Bäsleşikde baýrakly orna mynasyp bolup bilmedik, ýöne baýrakly orunlara dalaş eden fotosuratlar höweslendiriji Hormat haty bilen sylaglanylar.
4.4. Ýeňijileriň fotosuratlary Türkmenistanyň Daşary işler ministrliginiň Halkara gatnaşyklary institutynyň resmi saýtynda ýerleşdiriler.
Bäsleşige gatnaşmaga isleg bildirýänler baradaky maglumatlary (agzanyň ady, familiýasy, okaýan mekdebi, näçinji synpy) we bäsleşige tabşyryljak fotosuratlar institutyň hgi.redaksiya@gmail.com elektron salgysy arkaly kabul etmek 2024-nji ýylyň 20-njy dekabryndan başlap, 2025-nji ýylyň 10-njy martyna çenli aralygynda amala aşyrylar.
Habarlaşmak üçin:
Tel: +993 12 226852,
Elektron salgy: hgi.redaksiya@gmail.com