Watanyň geljegi-bilimli ýaşlar
16-njy noýabrda Ak mermerli paýtagtymyzdaky Jemgyýetçilik gurmalarynyň merkezinde we ähli welaýat merkezlerinde Türkmenistanyň Magtymguly adyndaky Ýaşlar Guramasynyň Merkezi Geňeşi tarapyndan yglan edilen Türkmenistanyň Ýaşlar baýragynyň eýesi diýen hormatly ada mynasyp ýaşlary sylaglamak dabaralary geçirildi.
Oňa ýurdumyzyň jemgyýetçilik guramalarynyň, köpçülikleýin habar beriş serişdeleriniň wekilleri, döredijilik işgärleri, bagtyýar talyplar hem-de Ýaşlar guramasynyň dürli edara-kärhanalarynda zähmet çekýän öňdebaryjy işjeň agzalary gatnaşdylar.
Türkmenistanyň Magtymguly adyndaky Ýaşlar guramasynyň döredilen güni mynasybetli ýokary derejede geçirilýän bu dabarada ýurdumyzyň edebiýatda, sungatda, medeniýetde, oba hojalygynda, ylymda, tehnikada, sportda, saglygy goraýyş ulgamynda, bilim we terbiýeçilik işlerinde gazanan üstünlikleri, alnyp barylýan içeri we daşary syýasatynda durmuşa geçirilýän beýik özgertmeleri, olaryň ýurdumyzyň, halkymyzyň durmuşyndaky taryhy ähmiýetini il arasynda wagyz-nesihat etmekde ýokary döredijilik başarnygyny hem-de işjeňligini görkezen ýaşlaryň 62-ne Türkmenistanyň Ýaşlar baýragynyň eýesi diýen at dakyldy we degişli şahadatnamalar şeýle-de hormatly Prezidentimiziň adyndan sowgatlar gowşuryldy.
Sowgat gowşurylyş dabarasynda Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň 3-nji ýyl talyby Hatyja Döwletnazarowa hem Magtymguly adyndaky Ýaşlar Guramasynyň Merkezi geňeşi tarapyndan yglan edilen Türkmenistanyň Ýaşlar baýragynyň eýesi diýen hormatly ada mynasyp boldy.
Ýurdumyzyň ähli babatdaky ösüşlerine özleriniň uly goşantlaryny goşýan bu abraýly baýraga mynasyp bolan ýaşlar dürli ugurlar boýunça netijeli iş alyp barmak bilen birlikde, özleriniň ukybyplaryny açyp görkezmäge ähli şertleriň döredilýändigi, ýerine ýetirilýän işleriň döwlet derejesinde höweslendirilýändigi üçin hormatly Prezidentimize tüýs ýürekden alkyş sözlerini aýtdylar.
Beggeldi GUTLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy
fakultetiniň talyby.