ULAG STRATEGIÝASYNYŇ GELJEKKI MÜMKINÇILIKLERINE BAGYŞLANAN OKUW SAPAGY
2024-nji ýylyň 25-nji noýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda «Türkmenistanyň ulag strategiýasyny durmuşa geçirmegiň sebit we dünýä ykdysadyýetindäki ähmiýeti» atly okuw sapagy geçirildi. Bu okuw sapagyny Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň direktory, Türkmenistanyň Adatdan daşary we Doly ygtyýarly Ilçisi Şiri Şiriýew alyp bardy. Okuw sapagynyň dowamynda Merkezi Aziýanyň üsti bilen Hytaýdan Ýewropa we Ýakyn Gündogar ýurtlaryna geçýän ugurlar barada aýratyn bellendi. Olaryň hatarynda Hytaý — Gyrgyzystan — Özbegistan — Türkmenistan — Eýran — Türkiýe we Ýewropa ýurtlaryna çykýan, şeýle hem Hytaý — Täjigistan — Özbegistan — Türkmenistan — Eýran we Ýakyn Gündogara çykýan ugurlaryň ykdysady ähmiýeti barada giňişleýin gürrüň edildi. Şeýle-de talyplar özlerini gyzyklandyrýan soraglaryna jogap tapdylar hem-de ulag diplomatiýasy baradaky bilimlerini artdyrdylar.
Aýgül MÄMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň IV ýyl talyby.