Türkmenistanyň Konstitusiýasynyň we Türkmenistanyň döwlet baýdagynyň güni mynasybetli ylmy-amaly maslahat geçirildi
2024-nji ýylyň 15-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli mugallymlaryň we talyplaryň gatnaşmagynda “Türkmenistanyň kanunçylygy we daşary syýasaty: parahatçylygy döretmegiň nusgalyk tejribesi” atly ylmy-amaly maslahaty geçirildi.
Maslahata Türkmenistanyň Döwlet, hukuk we demokratiýa institutynyň ylmy işgärleri, Türkmenistanyň Daşary işler ministrliginiň Halkara gatnaşyklary institutynyň hem-de beýleki ýokary okuw mekdepleriniň mugallymlary we talyplary şeýle-de “Ýaş diplomatlar” mekdebiniň işjeň agzalary bolan mekdep okuwçylary gatnaşdylar.
Ylmy-amaly maslahatyň umumy mejlisinden soň öz işini bölümçelerde dowam etdirdi. “Esasy Kanun we Döwlet baýdagy- Watanymyzyň Garaşsyzlyk hem-de Bitaraplyk ýörelgeleriniň mizemez Binýady”, “Türkmenistanyň Konstitusiýasy-parahatçylygyň, dostlugyň we hoşniýetliligiň hukuk binýady”, “Sanly ykdysadyýetiň ösüşinde Türkmenistanyň Konstitusiýasynyň orny”, “Türkmenistanyň Konstitusiýasy we Döwlet baýdagy-Watanymyzyň abadançylygynyň nyşany” atlary bilen geçirilen bölümçelerde bolsa Türkmenistanyň Konstitusiýasynyň kämilleşdirilişiniň, ynsanperwerlik ýörelgesiniň, Döwlet baýdagynyň mukaddesliginiň, milli kanunçylykda ýaşlaryň hukuk goraglylygynyň, ýurdumyzda eýeçilik gatnaşyklarynyň kämilleşmeginiň ähmiýeti we täsiri barada köp sanly çykyşlar diňlenildi.
Türkmenistanyň Konstitusiýasy özygtyýarly döwletimiziň mizemez hukuk binýady bolmak bilen, halkymyzyň bitewülik, demokratiýa, ynsanperwerlik, watançylyk we adalatlylyk baradaky köpasyrlyk arzuwlaryny şöhlelendirýär.
Maksat ATABALOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.