Awaza duşuşyklaryna bagyşlanan ylmy-amaly maslahat geçirildi
2026-njy ýylyň 16-njy oktýabrynda Türkmenistanyň Daşary işler ministrliginiň Halkara gatnaşyklary institutynda «Türkmenistanyň GDA-da başlyklyk etmegi: parahatçylyk we ynanyşmak dialogynyň sebit howpsuzlygyny üpjün etmekdäki täze tapgyry» atly ylmy-amaly maslahat geçirildi. Ylmy-amaly maslahatda 2026-njy ýylyň 7 — 9-njy oktýabrynda «Awaza» milli syýahatçylyk zolagynda geçirilen iri halkara duşuşyklara gatnaşan institutyň uly mugallymlary Perhat Çaryýew, Merjen Gurbannazarowa, Türkmenistanyň Prezidentiniň ýanyndaky Döwlet gullugy akademiýasynyň mugallymy, şahyr Gülşirin Hanowa, Halkara žurnalistikasy fakultetiniň 3-nji ýyl talyby Laçyn Tekedurdyýewa dagy çykyş etdiler. Žurnalistikanyň nazaryýeti we amalyýeti kafedrasynyň guramagynda geçirilen ylmy-amaly maslahata türkmen diplomatiýasynyň milli mekdebiniň professor-mugallymlary we talyplary gatnaşdylar.
Maslahatyň dowamynda çykyş edenler ýurdumyzyň hemişelik Bitaraplyk hukuk derejesinden gelip çykýan parahatçylyk döredijilikli taglymlar «Açyk gapylar» syýasatynda, deňhukukly dialogda, özara bähbitli hyzmatdaşlykda öz beýanyny tapýandygyny bellediler. Şunuň bilen baglylykda, şu ýyl Türkmenistanyň «Merkezi Aziýa we Azerbaýjan» formatynda hem-de GDA-da başlyklyk etmeginiň çäklerinde «Awaza» milli syýahatçylyk zolagynda Merkezi Aziýa ýurtlarynyň we Azerbaýjan Respublikasynyň döwlet Baştutanlarynyň konsultatiw duşuşygynyň, şeýle hem Garaşsyz Döwletleriň Arkalaşygynyň döwlet Baştutanlarynyň Geňeşiniň nobatdaky mejlisiniň geçirilmegi, onuň çäklerinde ugurdaş çäreleriň ençemesiniň guralandygyny nygtadylar. Çaraniň ahyrynda şahyr Gülşirin Hanowanyň ata Watanymyzy, ýurdumyzyň halkara gatnaşyklaryndaky nusgalyk göreldesini wasp edýän goşgularyny okamagy maslahatyň täsirliligini artdyrdy.
Şeýle ylmy-amaly maslahatlaryň yzygiderli guralmagy talyplaryň we geljekki halkaraçy hünärmenleriň ýurdumyzyň daşary syýasat ugruna, dünýä döwletleri bilen hyzmatdaşlygyň geosyýasy ähmiýetine bolan düşünjesini çuňlaşdyrmaga hem-de olaryň syýasy-diplomatik bilimlerini artdyrmaga kömek edýär.
Aýperi AKMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby