“TÜRKMENISTAN WE BMG: PARAHATÇYLYGYŇ WE ÖSÜŞIŇ HATYRASYNA HYZMATDAŞLYK” ATLY YLMY-AMALY MASLAHAT GEÇIRILDI
2025-nji ýylyň 30-njy oktýabrynda Türkmenistanyň Daşary işler ministrliginiň Halkara gatnaşyklary institutynda Jemgyýeti öwreniş ylymlary kafedrasynyň guramagynda “Türkmenistan we BMG: parahatçylygyň we ösüşiň hatyrasyna hyzmatdaşlyk” atly ylmy–amaly maslahat geçirildi. Maslahatda Jemgyýeti öwreniş ylymlary kafedrasynyň müdiriniň wezipesini ýerine ýetiriji, uly mugallym, filosofiýa ylymlarynyň kandidaty Ogulgurban Ezimowa, Türkmenistanyň Prezidentiniň ýanyndaky Döwlet gullugy akademiýasynyň mugallymlary Babahan Berdiýew, Aýsoltan Jepbarowa, Türkmenistanyň Saglygy goraýyş we derman senagaty ministrliginiň Halkara ýanyk şikeslerini bejeriş merkeziniň direktorynyň bejeriş işleri boýunça orunbasary Gültäç Annaýewa, Myrat Garryýew adyndaky Türkmenistanyň Döwlet lukmançylyk uniwersitetiniň Adam anatomiýasy, topografik anatomiýa we operatiw hirurgiýa kafedrasynyň aspiranty Merjen Berdiýewa, Döwlet gullygy akademiýasynyň magistrlik okuw ugry boýunça talyby Selbi Jumageldiýewa çykyş etdiler. Ylmy amaly maslahata institutymyzyň professor-mugallymlary we talyp ýaşlary gatnaşdylar.
Maslahatda çykyş edenler Türkmenistanyň Birleşen Milletler Guramasynyň Baş Assambleýasynyň 80-nji ýubileý sessiýasy, parahatçylygy we durnuklylygy pugtalandyrmak ugrunda halkara tagallalaryň möhüm tapgyry, halkara parahatçylygy, howpsuzlygy we durnukly ösüşi goldamakda hem-de berkitmekde hemişelik Bitaraplyk syýasatynyň orny we wajyplygy, Merkezi Aziýada howanyň üýtgemegi bilen bagly tehnologiýalaryň sebit merkezini döretmek baradaky teklipler barada giňişleýin gürrüň berdiler.
Ylmy-amaly maslahatyň ahyrynda gatnaşyjylar bilen sowal-jogap alyşyldy. Ösüp gelýän ýaş nesillerimizi watançylyk, parahatsöýüjilik , hoşniýetlilik, başarjaňlyk ruhunda terbiýelemekde uly ähmiýete eýe bolan maslahat täsirligi bilen tapawutlandy.
Güljahan AMANBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti
öwreniş ylymlary kafedrasynyň mugallymy.