Türkmen-rus gatnaşyklaryna bagyşlanan duşuşyk
2022-nji ýylyň 21-nji dekabrynda Türkmenistanyň Daşary işler ministrliginiň Halkara gatnaşyklary institutynyň Durnukly ösüş maksatlary boýunça ylmy-usulyýet Merkeziniň çäklerinde (DÖMYUM) Türkmenistanyň Russiýa Federasiýasyndaky Adatdan daşary we Doly ygtyýarly Ilçisi Batyr Niýazlyýew bilen institutyň talyplarynyň gatnaşmagynda duşuşyk geçirildi. Duşuşygyň barşynda Ilçi talyplara türkmen-rus gatnaşyklarynyň taryhy, şu güni, geljegi, iki ýurduň arasynda ýola goýlan syýasy, diplomatik, ykdysady, söwda, medeni, ylym, bilim ugurly gatnaşyklary dogrusynda giňişleýin gürrüň berdi.
Mundan başga-da, Ilçi talyplara ýurdumyz bilen Russiýa Federasiýasynyň arasynda ýola goýlan beýik geljegi nazarlaýan, ýurt, sebit hem-de dünýä ähmiýetli ikitaraplaýyn hyzmatdaşlyk, Gahryman Arkadagymyzyň hem-de Türkmenistanyň wekilçilikli toparynyň Russiýa Federasiýasyna amala aşyran sapary hem-de onuň çäklerinde gazanylan ylalaşyklar dogrusynda giňişleýin gürrüň berdi.
Duşuşygyň ahyrynda talyplar Ilçä türkmen-rus gatnaşyklary dogrusynda özlerini gyzyklandyrýan sowallary bilen ýüzlenip, olara giňişleýin jogap aldylar. Türkmen-rus gatnaşyklaryna bagyşlanan bu duşuşyk talyplarda uly täsir galdyrdy.
Aýnur HUDAÝBERGENOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.