TÜRKMEN HALYSYNYŇ MILLI MUZEÝINDE GEÇIRILEN BAÝRAMÇYLYK
2025-nji ýylyň 13-nji martynda Türkmenistanyň Daşary işler ministrliginiň
Halkara gatnaşyklary institutynyň ilkinji Zenanlar guramasynyň, ilkinji Ýaşlar
guramasynyň, “Ýaşlyk” teleýaýlymy bilen bilelikde Türkmen halysynyň milli
muzeýinde zeminde parahatçylygy, hoşniýetli goňşuçylygy, täzelenişi we tebigatyň
janlanmagyny alamatlandyrýan Milli bahar baýramy – Halkara Nowruz güni
mynasybetli aýdym-sazly döredijilik gezelenji we dabarasy geçirildi. Oňa
Türkmenistanyň Döwlet medeniýet merkeziniň Döwlet kitaphanasynyň halypa
kitaphanaçysy Bibigözel Mämmedowa, Aşgabat şäheriniň ýaşaýjysy
Türkmenistanyň Zenanlar bileleşiginiň Merkezi geňeşiniň işjeň agzasy Nurtäç
Muhammetnazarowa, şeýle-de institutyň aýdym-saz toparynyň çeper höwesjeňleri
we döredijilik bilen içgin gyzyklanýan talyp ýaşlary gatnaşdylar.
Baýramçylyk dabarasynda çykyş edenler adamzadyň iň gadymy baýramy
bolan Nowruz baýramynyň taryhy, aýratynlygy, onuň özboluşly däp-dessurlary
barada gürrüň etdiler. Halkara parahatçylyk we ynanyşmak ýyly mynasybetli
institutyň talyp ýaşlary tebigatymyzyň gözelliginiň, ýaşlygyň ýarany bolan bahar
paslynyň waspyny ýetirýän türkmen edebiýatynyň görnükli wekilleriniň miras
galdyran ajaýyp goşgularyna döredilen aýdym - sazlary ýerine ýetirdiler.
Dabarada edilen gyzykly çykyşlar, ýaňlanan ajaýyp aýdym-sazlar oňa
gatnaşyjylarda ýakymly täsirleri galdyrdy.
Mahym KAKAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.