Türkmen-amerikan gatnaşyklaryna bagyşlanan duşuşyk
2022-nji ýylyň 23-nji dekabrynda Türkmenistanyň Daşary işler ministrliginiň Halkara gatnaşyklar institutynyň Durnukly ösüş maksatlary boýunça okuw-usulyýet Merkeziniň çäklerinde Türkmenistanyň Amerikanyň Birleşen Ştatlaryndaky Adatdan daşary we Doly ygtyýarly Ilçisi Meret Orazow bilen institutyň professor-mugallymlarynyň gatnaşmagynda duşuşyk guraldy.
Duşuşygyň barşynda Ilçi türkmen-amerikan gatnaşyklarynyň çäklerinde gazanylan tejribe, ikitaraplaýyn hyzmatdaşlygyň häzirki ýagdaýy we geljekde özara bähbitli gatnaşyklary ösdürmekde öňde durýan wezipeler dogrusynda aýtdy. Şeýle-de Ilçi Türkmenistanyň we Owganystanyň arasyndaky syýasy, söwda-ykdysady, ylym-bilim, medeni-ynsanperwer gatnaşyklary mundan beýläk-de ösdürmekde alnyp barylýan işler barada durup geçdi.
Mundan başga-da, Ilçi M.Orazow türkmen-amerikan gatnaşyklaryna uly baha berip, olaryň howpsuzlyk, howanyň üýtgemegi, işewürlik, telekeçilik ýaly köp ugurlarda has-da ösýändigini belledi. Şeýle-de bu pudaklarda hyzmatdaşlygy ösdürmek, syýasy-ykdysady gatnaşyklary güýçlendirmek, ykdysady ösüşi işjeňleşdirmek hem-de iki ýurtda iş orunlaryny döretmek ugrunda alnyp barylýan netijeli işler barada giňişleýin gürrüň berdi.
Ilçi gürrüňini Türkmenistanyň we Amerikanyň Birleşen Ştatlarynyň arasyndaky 30 ýyllyk diplomatik gatnaşyklarynyň dowamynda ikitaraplaýyn hyzmatdaşlyk, özara gyzyklanma bildirilýän halkara we sebit meseleleri boýunça amala aşyrylan ähmiýetli işler barada giňişleýin dowam etdi. Hususan-da, medeni mirasy gorap saklamak boýunça bilelikdäki taslamalaryň amala aşyrylmagy, ABŞ-nyň öňdebaryjy ylym-bilim merkezleri bilen netijeli gatnaşyklaryň çuňlaşdyrylmagy bilen birlikde, bilim we medeniýet ugry boýunça gatnaşyklary giňeltmegiň mümkinçilikleri, ýurdumyzyň Medeniýet ministrligi tarapyndan arheologik gazuw-agtaryş işlerini alyp barmak boýunça 2021-2025-nji ýyllar üçin ylalaşygyň taslamasy barada gürrüň berdi.
Mundan başga-da, ýakynda Gahryman Arkadagymyzyň hem-de hormatly Prezidentimiziň «Türkmenistan-ABŞ» işewürler geňeşiniň Ýerine ýetiriji direktory, iri amerikan kompaniýalarynyň ýolbaşçylary bilen geçiren ikitaraplaýyn duşuşyklary, olaryň netijesinde gazanylan ylalaşyklar dogrusynda nygtady.
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň mugallymy.