SUW DIPLOMATIÝASY UGRY BOÝUNÇA OKUW SAPAGY
2023-nji ýylyň 20-nji martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlarynyň biri bolan Suw diplomatiýasy ugry boýunça okuw sapagy geçirildi. Okuw sapagyny BMG-niň Çagalar Gaznasynyň (ÝUNISEF-iň) Türkmenistandaky wekilhanasynyň Bilim maksatnamasy boýunça hünärmeni Nazar Mämmedow alyp bardy. “Howanyň üýtgemegine uýgunlaşmak we ekologiýa diplomatiýasy” temasyna bagyşlanan okuw sapagynyň dowamynda halkara bilermen howanyň üýtgemegine we onuň netijelerine garşy göreşmekde dünýä ýüzünde alnyp barylýan işler barada gürrüň berdi. Şeýle-de daşky gurşawy goramak boýunça halkara hyzmatdaşlygyny ýola goýmak döwletimiziň daşary syýasatynyň esasy ugurlarynyň biridir. Bu ugurda ýurdumyzyň BMG-niň ekologiýa ulgamy bilen baglanyşykly halkara konwensiýalarynyň hem-de maksatnamalarynyň birnäçesine goşulmak bilen BMG-niň Baş Assambleýasynyň mejlislerinde we beýleki maslahatlarynda halkara başlangyçlary bilen çykyş edýändigini hünärmen aýratynlykda belläp geçdi.
Okuw sapagyna gatnaşan talyplar üçin bu okuw sapagy diýseň täsirli bolup, olar özlerini gyzyklandyrýan sowallara giňişleýin jogap aldylar.
Töfe HOŞANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara jemagat hukugy ugrunyň magistranty.