SUW DIPLOMATIÝASY – TÜRKMENISTANYŇ DAŞARY SYÝASATYNYŇ MÖHÜM UGRY
Berkarar döwletiň täze eýýamynyň Galkynyşy döwründe hormatly Prezidentimiziň ýolbaşçylygynda ýurdumyzda ýokary bilimiň ylmy binýadyny we hilini ýokarlandyrmaga aýratyn üns berilýär we bu babatda ähli şertler döredilýär.
Ýurdumyzyň suw diplomatiýasyny ylmy taýdan içgin öwrenmek maksady bilen, hormatly Prezidentimiz 2018-nji ýylyň 20-nji dekabrynda Türkmenistanyň Daşary işler ministrliginiň Halkara gatnaşyklary institutynyň düzüminde Türkmenistanyň diplomatiýasynyň möhüm ugurlary boýunça okuw merkezini açmak baradaky Karara gol çekdi. Türkmenistanyň häzirki zaman halkara gatnaşyklarynyň belent talaplaryna jogap berýän täze mazmunly hem-de işjeň häsiýetli diplomatiýasynyň emele gelmegi we onuň Birleşen Milletler Guramasy derejesinde energetika, ulag, suw meseleleri boýunça hyzmatdaşlygyň toplumlaýyn halkara-hukuk binýadyny döretmekde aýgytlaýjy orun eýelemegi Merkeziň ulgamlaýyn işiniň esasyny düzýär.
2021-2022-nji okuw ýylynyň ikinji ýarymynda merkezde okuwlaryň nobatdaky tapgyry öz işine başlady. Türkmenistanyň diplomatiýasynyň möhüm ugurlary boýunça okuw Merkeziniň Düzgünnamasyna laýyklykda, bu tapgyrda, merkeziň diňleýjileri hökmünde institutyň ähli fakultetleriniň talyplaryndan düzülen topar gatnaşýar. Tassyklanan meýilnama laýyklykda, degişli temalar boýunça umumy we söhbet sapaklary geçirilýär. 2022-nji ýylyň 9-njy martynda “Suw diplomatiýasy” boýunça okuw Merkezinde Türkmenistanyň Daşary işler ministrliginiň Halkara gatnaşyklary institutynyň Halkara jemagat hukugy ugrunyň magistrantlary “Suw diplomatiýasy – Türkmenistanyň daşary syýasatynyň möhüm ugry” atly tema bilen diňleýjileriň öňünde okuw sapagyny geçdiler.
Sapagyň barşynda Garaşsyz, baky Bitarap Türkmenistan özüniň alyp barýan oňyn bitaraplyk syýasaty esasynda dünýäniň ençeme döwletleri bilen diplomatik gatnaşyklary ýola goýandygy, şolardan, esasan hem ulag, energetika we suw diplomatiýalary häzirki wagtda ýurdumyzda köpugurly öwrenilýän we ösdürilýän ugurlaryň biri hasaplanylýandygy barada gürrüň berildi. Bulardan başga-da Türkmenistanyň umumy tagallalaryň birleşdirilmegi hem-de tejribeleriň özara bähbitli alyşylmagyna gönükdirilen suw diplomatiýasy BMG-niň işine hem täze ileri tutulýan ugurlary goşmak bilen, milli, sebit we global derejesinde gülläp ösüşe hem-de abadançylyga itergi berýändigi barada giňişleýin çykyşlar edildi.
Türkmenistanyň suw diplomatiýasy suw we suw energetika ulgamlarynda hereketleri utgaşdyrmak maksady bilen, beýleki döwletler, ilkinji nobatda bolsa, goňşy döwletler bilen işjeň we gyzyklanma bildirilip hyzmatdaşlyk edilmegini göz öňünde tutýar. Şunuň bilen baglylykda, Türkmenistan esasy wezipesini halkara hukugynyň umumy ykrar edilen kadalarynyň, birek-birege hormat goýmagyň we sebitiň ähli döwletleriniň bähbitlerini nazara almagyň esasynda hem-de halkara guramalarynyň gatnaşmagynda sebit ylalaşygyny gazanmakda görýär.
Okuw sapagynyň dowamynda agzalan ugurlar boýunça ýörite taýýarlanylan mysallaryň üstünde durlup, olar boýunça diňleýjiler bilen pikir alyşmalar boldy.
Serdar AGAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara
jemagat hukugy ugrunyň magistranty.