SUW DIPLOMATIÝASY BOÝUNÇA OKUW SAPAGY GEÇIRILDI
2024-nji ýylyň 14-nji iýunynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Suw diplomatiýasy” ugry boýunça “Türkmenistanyň suw gorlary we olary rejeli ulanmak boýunça halkara hyzmatdaşlygy” atly temadan nobatdaky okuw sapagy geçirildi. Okuw sapagyny Türkmenistanyň Daşky gurşawy goramak ministrliginiň Çöller, ösümlik we haýwanat dünýäsi milli institutynyň Çölleşmegiň monitoringi we çägeleri berkitmek laboratoriýasynyň müdiri Halmuhammet Ataýew alyp bardy.
Okuw sapagynda Türkmenistanyň Daşky gurşawy goramak ministrliginiň wekili obasenagat toplumynda iň täze tehnologiýalara hem-de netijeli inženerçilik çözgütlerine esaslanmak bilen, Türkmenistan suwuň her bir damjasyny rejeli sarp etmek üçin suw serişdelerinden peýdalanmagyň netijeliligini ýokarlandyrmagy ugur edinýändigini we suw howdanlarynyň sygymlylygyny artdyrmak boýunça yzygiderli işler geçirilýändigini belledi. Munuň özi suwuň ätiýaçlyk gorlaryny döretmäge mümkinçilik berýär. Bu işler geljegi nazarlamak esasynda geçirilip, esasan-da, gyş-ýaz möwsüminde ýurdumyzyň suw üpjünçiliginiň ygtybarly binýadyny goýmaga, howanyň ählumumy üýtgemeginiň hem-de gurakçylygyň mümkin bolan oňaýsyz täsirlerini peseltmäge mümkinçilik berjekdigi barada giňişleýin gürrüň berdi. Şeýle-de suwdan rejeli peýdalanmak boýunça Türkmenistanda durmuşa geçirilýän syýasatdan gelip çykýan wezipelere laýyklykda “Altyn asyr” Türkmen kölüniň sebitini 2019 — 2025-nji ýyllarda özleşdirmegiň Konsepsiýasyny ýerine ýetirmek boýunça çäreleriň meýilnamasy yzygiderli amala aşyrylýandygyny barada belledi.
Talyplar üçin suw diplomatiýasy boýunça nobatdaky okuw sapagy örän täsirli boldy. Onda talyplar özlerini gyzyklandyrýan sowallara jogap tapdyrlar.
Leýli ARAPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.