SUW DIPLOMATIÝASY BOÝUNÇA MÖWSÜMLEÝIN OKUWLAR TAMAMLANDY
2024-nji ýylyň 25-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda suw diplomatiýasy ugry boýunça 2023-2024-nji okuw ýylynyň II ýarymýyllygynyň jemleýji okuw sapagy geçirildi. Bu okuw sapagyna Türkmenistanyň Daşky gurşawy goramak ministrliginiň wekili, Magtymguly adyndaky Türkmen döwlet, S.A.Nyýazow adyndaky Türkmen oba hojalyk uniwersitetiniň, Halkara ynsanperwer ylymlary we ösüş uniwersitetleriniň hem-de Türkmenistanyň Daşary işler ministrliginiň Halkara gatnaşyklary institutynyň mugallymlary we talyp ýaşlary gatnaşdylar. Bu okuw sapagy «Türkmenistanyň suw gorlary we olary rejeli ulanmak boýunça halkara hyzmatdaşlygy» atly tema boýunça geçirildi.
Okuw sapagynyň dowamynda hormatly Prezidentimiziň syýasatynyň ileri tutulýan ugurlarynyň biri daşky gurşawy goramakdan, tebigata aýawly garamakdan, geljekki nesiller üçin onuň baýlyklaryny gorap saklamakdan, türkmen halkynyň durmuşynyň oňaýly şertlerini döretmek üçin ýer-suw serişdelerinden oýlanyşykly peýdalanmakdan, Durnukly ösüş maksatlaryna ýetmekde dünýä jemgyýetçiliginiň tagallalaryny birleşdirmekden ybaratdygy barada giňişleýin gürrüň edildi.
Jemleýji okuw sapagynyň ahyrynda Türkmenistanyň diplomatiýasynyň möhüm ugurlary boýunça okuw merkezinde Suw diplomatiýasy ugry boýunça möwsümleýin okuwlaryň tamamlanmagy mynasybetli oňa gatnaşyjylara degişli Şahadatnamalar gowşuryldy.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.