Suw diplomatiýasy boýunça geçirilen okuw sapagy
2023-nji ýylyň 11-nji maýynda Türkmenistanyň Daşary işler ministrliginiň Halkara gatnaşyklary institutynda Suw diplomatiýasy boýunça “Aralýaka sebitiniň ekologik meseleleri” atly okuw sapagy geçirildi. Okuw sapaga Birleşen Milletler Guramasynyň Türkmenistandaky hemişelik utgaşdyryjysy Dmitriý Şlapaçenko, Türkmenistanyň Daşary işler ministrliginiň Halkara guramalary departamentiniň geňeşçisi Magtymguly Akmyradow, institutyň mugallymlary hem-de talyp ýaşlary gatnaşdylar.
Sapagyň dowamynda çykyş edenler global suw ekologiýa meselelerini çözmekde, şol sanda Aral deňzini halas etmek üçin dünýä bilelişiginiň goldawynyň toplumlaýyn çemeleşilmegini, Aral ýakasyndaky ýagdaý bilen baglanyşykly birnäçe meselelerine BMG-niň işjeň we ulgamlaýyn gatnaşmagynyň möhümdigini hem-de Halkara gaznasyna girýän döwletler “Aral deňziniň basseýninde ekologik we durmuş-ykdysady ýagdaýy gowulandyrmak boýunça anyk hereketleriň Maksatnamasynyň” üç tapgyryny ýerine ýetirmek zerurdygyny bellediler.
Bu okuw sapagynyň maksady “Suw – tutuş adamzadyň, dünýäniň ähli halklarynyň umumy bähbidi” diýen düşünjede jemlenýär. Suwa jogapkärli çemeleşmek adamlaryň baş hukugy bolup durýar.
Maksat ASTANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.