ŞÖHRATLY TARYHYM – GÖRELDE MEKDEBIM
2021-nji ýylyň 4-nji noýabrynda Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň “Paýhas we parasat” ylmy gurnagynyň agzalary bilen “Şöhratly taryhym – görelde mekdebim” atly iňlis dilinde ylmy-seminar geçirildi. Seminaryň dowamynda Jemgyýeti öwreniş ylymlary kafedrasynyň uly mugallymy A.Baýmuradowa hormatly Prezidentimiziň ýaşlarymyzyň döwrebap bilimli, milli terbiýeli bolmaklary üçin edýän bimöçber aladalary hakynda belläp, taryhyň, aýratyn hem, türkmen taryhynyň ýaş nesli watansöýüjilik ruhunda terbiýelemekde wajypdygyny belledi. Mugallym beýik alym Mahmyt Zamahşary barada çykyş edip, alymyň ylymda gazananlary, onuň görelde alarlyk durmuş ýoly hakynda giňişleýin gürrüň berdi.
Ylmy seminaryň dowamynda Halkara žurnalistikasy fakultetiniň II ýyl talyby Dilnoza Muhadowa, Halkara gatnaşyklary we diplomatiýa fakultetiniň II ýyl talyby Akgözel Rasulowa türkmen halkynyň şöhratly taryhyny beýan edýän iňlis dilindäki ylmy nutuklar bilen çykyş etdiler.
“Paýhas we parasat” gurnagynyň agzalary bilen geljekde geçiriljek seminarlaryň temalary ara alnyp maslahatlaşyldy. Şeýle hem olaryň arasynda “Beýik Mogollar döwletiniň han-hanany - Bayram han” atly bäsleşik yglan edildi we bäsleşigiň şertleri bilen tanyşdyryldy.
Ylmy seminary Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty Ogulgurban Ezimowa jemledi. Ol talyplara geljekde hem gurnagyň işine işjeň gatnaşmaklygy, daşary ýurt dillerini uly höwes bilen öwrenmekligi, ylym bilen meşgullanmagy dowam etmekligi maslahat berdi.
Aýna BAÝMURADOWA,
Türkmenistanyň Daşary işler ministrliginiň
Jemgyýeti öwreniş ylymlary
kafedrasynyň uly mugallymy.