«SCOPUS» gorunda žurnallary seljermegiň usullaryna bagyşlanan maslahat
2024-nji ýylyň 31-nji maýynda Halkara ynsanperwer ylymlary we ösüş uniwersitetinde «SCOPUS» gorunda žurnallary seljermegiň usullary» atly tema boýunça onlaýn görnüşinde okuw-usuly maslahat geçirildi. Maslahata sanly ulgam arkaly ýurdumyzyň ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň professor-mugallymlary hem gatnaşdylar.
Okuw-usuly maslahat Türkmenistanyň Bilim ministrligi tarapyndan tassyklanylan «Ýurdumyzyň ýokary okuw mekdeplerini dünýäniň abraýly ýokary okuw mekdepleriniň sanawyna goşmak boýunça alnyp barylýan işleri kämilleşdirmek maksady bilen, halkara ylmy-tehniki maglumat çeşmeleri, olarda indekslenen žurnallarda makalalary çap etmek, dürli bibliometrik görkezijiler bilen bagly düşünjeleri artdyrmak boýunça okuw-usuly maslahatlary we seminarlary geçirmegiň Tertibine» laýyklykda guraldy.
Maslahatda dünýäniň iri ylmy neşirleriniň biri bolan «SCOPUS» gorunda žurnallary seljermegiň usullary barada giňişleýin durlup geçildi. Bellenilişi ýaly, bu akademiki neşirde dünýäniň meşhur ylmy edebiýatlary, bibliografik görkezijiler çap edilýär. Bu babatda özara hyzmatdaşlygy ilerletmek meselesine aýratyn üns çekildi. Ýurdumyzyň ylmy jemgyýetçiliginiň wekilleri gün tertibindäki meselelere uly gyzyklanma bildirdiler.
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallymy.